Maugrat qu’es un estudi fach amb de mirgas, los cercaires son pro valents per espandir l’afirmacion als umans. Per ansin, far d’exercici fisic cada setmana entraïnariá una creissença de las sinapsis que i a a l’ipocamp e ajudarián plan lo cervèl per aprene melhor. L’estudi foguèt publicat al numeric eLife.
Aital, e segontes aquel estudi realizat per plusors cercaires de l’Institut Vollum e l’Escòla de Medecina d’Oregon, de brèus periòdes d’exercici activan un gèn que provòca la creissença de las connexions neuronalas a l’ipocamp, una region que fa de temps qu’es estada restacada amb de processes de la memòria e l’aprenentatge.
“Far d’exercici fisic es economic e cal pas anar al gimnàs o córrer dètz quilomètres cada jorn, çò diguèt Gary Westbrook, cercaire de l’Institut Vollum. E far d’exercici fisic regularament ajuda l’activitat cerebrala e plan”.
L’estudi arribèt après se conéisser que far d’exercici fisic ajuda la santat mentala e lo cervèl dels umans. Mas se pòt pas mesurar cossí de debana aquò. Aital, es malaisit mesurar cossí ajuda lo còr, lo fètge e los muscles e es encara pus malaisit mesurar cossí pòt ajudar l’activitat cerebrala. Mas o fa. Au mens balha d’oxigèn al cors e atanben al cervèl.
Cossí ajuda far d’exercici
“D’estudis anteriors volián demostrar que far d’exercici de manièra regulara ajudavan l’activitat cerebrala, çò diguèt Westbrook. Coma de neuroscientifics avèm volgut estudiar quals èran los beneficis pel cervèl e pas pus lo còr o los muscles”.
Pr’aquò foguèt fach un estudi sus de mirgas. L’exercici jornalièr pendent doas oras las ajudava plan aprene melhor e las responsa de lors cervèls foguèt evidenta. Los autors de l’estudi poguèren confirmar que far d’exercici fisic entraïnava una creissença clara de las sinapsis de l’ipocamp dels animals.
La tròba se passèt quora analizèron los gens que patissián una creissença de l’activitat neuronala pendent lo periòde d’exercici fisic. Un gèn nomentat Mtss1L que codifica una proteïna foguèt trapat coma principal responsable. E aquò menèt los cercaires a confirmar cossí ajudava lo cervèl l’activitat fisica. E, en mai d’aquò, atanben trobèron que far solament pauc d’exercici fisic es pro per reviscolar lo cervèl uman.
La Redaccion
