ES TRAPADA UNA NÒVA ESPÈCIA DE CROCODIL ALS PIRENÈUS
Lo classament del crocodil preïstoric foguèt possible mercés a la trobalha del fossil raubat e trapat per la policia catalana. La nòva espècia foguèt nomentada coma Ogresuchus furatus e lo fossil foguèt trobat al vilatge catalan de Coll de Nargó. Ogresuchus foguèt un crocodil pichon que minjava d’uòus de dinosaures als Pirenèus.
La descobèrta e classament de la nòva espècia foguèt publicada al numeric Scientific Reports e es la resulta del trabalh paleontologic que fa l’Institut Catalan de Paleontologia Miquel Crusafont als Pirenèus dempuèi fa pus de 10 ans. La còla que l’estudièt foguèt dirigida per Albert G. Sellés, d’aquel institut paleontologic catalan.
Ogresuchus furatus vòl dire lo crocodil-ogre, que foguèt raubat e fa referéncia a un episòdi criminal que se passèt justament quand la còla de cercaires que ne trapèt las traças fossilas èra a mand de l’aver. Foguèt lo jorn abans que lo fossil foguèt raubat e demorèt en luòc inconegut pendent de setmanas, fins que de policièrs catalans poguèren lo trobar tornarmai.
Per ansin, Ogresuchus foguèt classat coma una nòva espècia de crocodil preïstoric e de la familha dels sebecids, un grop de crocodils terrèstres que demorèt demest fa 66 e 15 milions d’annadas. Lo fossil trapat a una edat de 71 milions d’ans e es l’especimèn de sebecid mai antica jamai trobada fins al moment actual.
Segon los cercaires Ogresuchus es fins a 10 milions d’annadas anterior a totes lo sebecids trapats fins a uèi “e aquò entraïna tornar a escriure l’istòria evolutiva d’aquela estonanta familha de crocodils, çò diguèt Sellés”.
La familha dels sebecids foguèt una familha de crocodils qu’aguèron las pautas jos lo còrs , pas coma los crocodils actuals e aquò ajudava pan a marchar coma los mamifèrs e doncas èsser de predators plan actius, çò confirmèt aquel paleontològ catalan. Lo fossil d’Ogresuchus foguèt trapat environat per de traças d’uòu de titanosaure e aquò fa pensar que podián plan èsser las sieunas prèdas, malgrat que foguèsson pas la sieuna noiridura principala.
Ogresuchus foguèt classat doncas coma un crocodil plan pichon (mens d’un metre de longor) amb de dents ponchudas e de pautas agilas, que caçava de pichonas prèdas. Cal rebrembar que las montanhas dels Pirenèus, fa 66 milions d’ans, foguèron un replanat amb de vegetacion tropicala amb de paluns salats pertot e ont i visquèron los darrièrs dinosaures europèus abans de lor extincion: titanosaures e hadrosaures al costat d’autras espècias de reptils coma de crocodils o tartarugas mas tanplan de granolhas o de peisses.
La Redaccion
