Dempuèi 2010, una còla d’arqueològs israelians estudiava un crani fossil trapat a Nesher Ramla, en Israèl. Sonque ongan s’es pogut confirmar qu’èra una nòva espècia ominida que demorèt en aquel luòc fa 130 000 ans. L’espècia es pròcha dels neandertalians e mòstra que, fin finala, l’environament ominid èra fòrça mai complèxe, amb almens cinc espècias que visquèron amb nòstra espècia: es Homo sapiens sapiens, Homo neandertalensis, Homo denisovensis e Homo dracus (una autra nòva espècia tanben trapada en China aqueste estiu). La nòva espècia a per nom Homo Nesher Ramla.
Segon los cercaires, Homo Nesher Ramla demorèt en Orient Mejan entre fa 400 000 ans e 100 000 ans. A mai, auriá plan conegut nòstra espècia, Homo sapiens. Tot aquò provocarà, de segur, un cambiament prigond del vejaire qu’avèm sus l’evolucion de l’espècia umana, car seriá confirmat que, devèrs la fin del Pleistocèn, i aguèt fins a cinc espècias diferentas contemporanèas, sens comptar d’autras sosespècias coma Homo floresiensis o Homo luzonensis. Benlèu d’autras ne seràn confirmadas.
Per ansin, se dobrís la pòrta a una nòva vision d’aquela epòca amb una evolucion plan mai complèxa que çò que se seriá pensat fins ara. E l’Orient Mejan i seriá essencial, car foguèt lo luòc ont mai d’una espècia visquèron amb d’autras. Lo crani e la maissa d’Homo Nesher Ramla an aperaquí 130 000 ans e demorèron en un luòc ont fins a uèi sonque se coneissiá de rèstas de nòstra espècia en mai de rèstas neandertalianas.
Un ominid arcaïc
Homo Nesher Ramla foguèt un ominid arcaïc, primitiu, amb de traches neandertalians coma la maissa e las dents, mas tanben de caracteristicas d’Homo erectus, çò que fa pensar que poiriá èsser una espècia nòva per rapòrt a de neandertalians e d’erectus.
Segon los paleantropològs qu’an confirmat l’existéncia d’aquela nòva espècia, Homo Nesher Ramla seriá demorat en Orient Mejan a partir de fa 400 000 ans e poiriá èsser a l’origina d’autras espècias posterioras coma los neandertalians o encara d’autras espècias ominidas asiaticas. Seriá doncas l’espècia maire qu’entraïnèt la naissença posteriora d’autras espècias d’ominids que puèi aurián conquistat Euròpa e Asia. Homo nesher, per tant, seriá l’espècia fondamentala que s’espandiguèt per l’èst e l’oèst de la planeta ominida.
En mai d’aquò, l’estudi sus aquesta nòva espècia conclutz que se seriá crosada tanben amb d’autras espècias fa 200 000 ans. Aital o confirmariá la tecnica de bastiment d’espleches de pèira, en mai de la genetica. Lo crosament, doncas, foguèt genetic mas tanben cultural, çò que vòl dire que las divèrsas espècias se coneissián plan entre elas.
S’aquò pòt cambiar lo vejaire qu’avèm sus l’evolucion umana fins ara, ja que sembla que lo brèç primièr ont nasquèt l’espècia nòstra foguèt l’Orient Mejan e pas Africa ? Cal far d’estudis plan mai prigonds per confirmar aquela ipotèsi, pr’amor que, benlèu, l’evolucion umana pendent lo Pleistocèn aguèt per origina l’Orient Mejan, un fach revolucionari e plan nòu dins la vision qu’avèm sus l’istòria d’aquela o aquelas espècias ominidas.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
