Fasiá de temps que la paleoantropologia podiá pas descobrir e classificar nòvas espècias d’ominids modèrns. Mas 2021 serà, aumens, tanben remembrat coma l’an que foguèron descobèrtas doas nòvas espècias que visquèron pendent la quita epòca d’Homo sapiens sapiens e que lo coneguèron. La teoria de l’evolucion simpla doncas ven de mai en mai malaisida per explicar cossí se desvolopèron los ominids. Pr’amor qu’ara pòt èsser confirmat que visquèron amassa nòstra espècia, neandertalians, denisovans, Homo erectus, Homo nesher e ara Homo longi, a mai de divèrsas sosespècias.
Homo longi es la darrièra espècia d’ominid contemporanèa de la nòstra espècia descobèrta fa gaire. Los scientifics que lo classifiquèron apondèron que son nom es longi, çò que vòl dire Dragon. Per ansin, Homo longi auriá viscut en China fa aperaquí 146 000 annadas e malgrat qu’aguèt una fàcia estranha la siá capacitat cerebrala foguèt parièra a la d’Homo sapiens sapiens.
Lo nom d’Homo longi ven pr’amor quel nom de la region del nòrd-èst de China que foguèt lo luòc ont se debanèt la tròba. Segon los cercaires que trapèron aquel cran foguèt un òme, naut e fòrt, amb una edat pròcha als 50 edats. Homo dragon aguèt de traches primitius e al còp modèrns; lo cap èra fòrça plan, las celhas tanplan, la boca granda e las dents plan mai grandas que las d’un uman d’uèi lo jorn. Mas lo cran èra gigantàs per rapòrt a d’autras espècias, pr’açò òm ditz que la siá capacitat cerebrala èra, aumens, parièra a la nòstra.
L’estudi ont foguèt presentada aquesta nòva espècia ominida foguèt publicat al numeric The Innovation . Segon aqueste estudi Homo longi seriá clau dins lo quadre de l’evolucion umana car confirmariá que fa aperaquí 200 000 ans i aviá fins a nou espècias ominidas contemporanèas sus la Tèrra; nosautres, de neandertalians, l’òme de Denisova, Homo daliensis, erectus, denisovensis, floriensis e luzonensis e Homo nasher.
Un cran amb una longa istòria
L’istòria del cran fossil d’Homo dragon es estada un pauc estranha pr’amor que foguèt trapada per un paisan chinés fa fòrça annadas, en 1933 mas que l’amaguèt pr’amor qu’aviá paur dels japoneses. Per ansin, cambièt de mans generacion aprés generacion fins que la familha decidiguèt lo balhar a la sciéncia en 2018. Malurosament uèi lo jorn los cercaires pòdon pas conéisser cossí foguèt l’environament ont foguèt trobat aquel cran per estudiar lo clima d’aquela espècia ominida. Sonque amb un pauc de tèrra sul cran poguèron confirmar l’edat del cran: 146 000 ans.
Homo longi foguèt naut e fòrt. Aguèt de caracteristicas semblantas a las d’Homo erectus, la primièra espècia ominida que sortiguèt d’Africa e arribèt a Asia. Aquò se debanèt fa 1,9 milions d’ans. Mas que tanben a de traches que remembran a nòstra espècia, que seri´arribada a l’airal fa sonque 50 000 ans.
Los scientifics confirmèron, a mai, que seriá l’espècia ominida la pus pròcha de la nòstra pr’amor que los neandertalians se serián desseparats de la linha evolutiva comuna fa mia de 400 000 ans. Totun, que i a cercaires que son pas d’acòrdi a l’ora de classificar aquel ominid coma una espècia desparièra e diferenta d’autras. Cal trapar qual foguèt lo contèxt environamental e conéisser melhor cossí visquèt. Amb un rand, çò dison, n’i a pas pro.
Divèrses cercaires chineses classifiquèron tanben la maissa trapada en Tibet fa gaire coma Homo longi. Pasmes, l’estudi genetic confirmèt que foguèt mai un denisovan. Aquò balha de dobtes sus la descobèrta car plusors cercaires declarèron qu’una espècia pòt às èsser familha dels neandertalians e tanben de sapiens. E los denisovans semblariá que foguèron una espècia plan pròcha als neandertalians, aumens en Asia. Pr’açò apondon qu’es una espècia benlèu mai pròcha dels neandertalians que de nosautres.
Pasmens, que l’espècia trapada al Tibet tanben es dobtosa car segon qualqu’unes cercaires es un denisovan mas divèrses traches paleogenetics confirmarián qu’es mai lèu un ominid de la nòstra espècia. La resulta finala, totun, seriá fòrça complèxa pr’amor que la polemica encara es dubèrta. Mas cossí que siá l’arbre de l’evolucion foguèt pendent divèrsas epòcas plan mai complèx que çò qu’òm aviá pensat car i visquèron divèrsas espècias e sonque una d’aquelas foguèt la nòstra ancessora. Mas quina ?
Un article de Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
