Segontes una nau estudi hèt sobre es possibles reaccions emotiues des corbassi, diuèrsi cercaires poderen confirmar qu’aguesta espècia animau compartís eth mau umor de manèra generau. Çò que non podec èster demostrat ei qu’es corbassi tanben compartissen eth bon umor.
Açò ei pr’amor qu’es corbassi, que son un animau extraordinàri ara ora de resòlver problèmes dificils, poden reaccionar damb empatia. Era naua recèrca a coma conclusion principau qu’aguestes aus compartissen, au mens, es emocions negatiues mès que non es positiues. Er estudi hèt sobre es corbs e es sues responses emotiues siguec publicat en jornau online Proceedings of the National Academy of Sciences.
Atau, es corbassi son animaus fòrça coneishudi pera sua nauta capacitat entà resòlver problèmes dificils. Ara, totun, tanben ac poiràn èster pr’amor dera sua empatia damb d’auti corbassi. Er estudi siguec hèt pr’amor que ja se sabie qu’es corbassi tanben an ua auta capacitat, era de consolar un corbàs trist. Pr’açò ua còla de cercaires de Viena, dirigida per Thomas Bungnyar, un etològ dera universitat d’aquera ciutat, ne volguec saber mès.
Es cercaires desseparèren diuèrsi corbassi en tot balhar caishes as aus damb minjar bon o dolent. Quora es corbassi vedien qu’es auti corbassi non aimauen eth minjar e èren de mau umor tanben eri se metien de mau umor. Era experimentacion siguec hèta enquia quate còps damb resultats semblanti. Mès es corbassi non auien bon umor quan vedien es auti corbassi contenti.
Segontes es cercaires açò poirie auer coma origina qu’es corbassi an empatia solament pes males emocions pr’amor qu’en environament non receben sensacions positiues. Es sensacions negatiues serien mès facils d’imitar e de véder pr’amor qu’en environament i a sovent mès informacion negatiua ath torn des corbassi.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
