Los fisicians del CERN an observada la produccion de triplets de bosons febles. E an anonciat la primièra observacion de produccion de VVZ — una combinason rara de tres bosons vectorials massísses. Coma portaires de fòrça febla, los bosons W e Z son centrals en lo nomenat Modèl Estandard de fisica de particulas.
De mesuras precisas balhan una excelenta pròva del Modèl Estandard e poirián ajudar a compréne nòus fenomèns. “La produccion de tres bosons vectorials (V) es un procès fòrça rar”, çò diguèt Fabio Cerutti, d’ATLAS. “La sieuna mesura balha d’informacions sus las interaccions entre los bosons multiples, ligats dejós de multiples simetrias d’aquel modèl.”
“Aquò ajudarà a descobrir fenomèns fisics nòus coma particulas nòvas que son tròp pesugas per èsser dirèctament produchas en LHC.” Aital , la còla d’ATLAS observèt la produccion de VVZ amb sonque 6,4 desviacions estandard. Los bosons W e Z son qualcunas de las particulas mai pesugas conegudas e doncas pòdon se descompausar de fòrmas plan desparièras.
L’estudi de 7 canals diferents
Los cercaires estudièron 7 canals que foguèron milhorats amb una nòva tecnica nomenada d’aprendissatge automatic d’arbres de decision impulsats, amb d’algoritmes entrenats per cada canal per identificar lo senhal cercat. En combinant los canals de decadéncia, los cercaires poguèron espepissar la produccion de VVZ e fixar limitas per confirmar las resultas.
“Segon analisam las donadas mai grandas de la tresena corsa del LHC e del HL-LHC que ven, afinarem mai las mesuras de produccion de tres bosons vectorials e la nòstra compreneson d’aquelas particulas fondamentalas vindrà mai clara. E tanben lor ròtle en l’Univers, çò diguèron los cercaires. L’estudi foguèt publicat a la revista Physics Letters B.
La Redaccion
