ER OLOCÈU AUEC UA ORIGINA COSMICA
Hè 12.800 annades eth clima dera Tèrra tornèc a cambiar. Siguec era fin dera edat deth glaç e era umanitat podec espandir-se coma non ac auie hèt jamès abans. Totun, era comunautat scientifica encara ei dividia aué. Diuèrsi scientifics afirmen que tot açò auec ua origina terrèstra. D’auti cosmica. Ara ua còla de cercaires trapèc mès d’ua pròva que demòstre qu’aguest cambiament climatic auec coma causa era casuda de diuèrsi meteòrs ena Tèrra.
“Eth cambiament que se passèc hè 12.800 annades provoquèc eth començament d’ua naua edat geologica; er Olocèu, çò confirmèc James Kennett, dera Universitat UC de Santa Barbara, en Califòrnia. E siguec fòrça mès extrem que non auien pensat. Semble que cada viatge i a mès e mès pròves entà demostrar que siguec un cambiament climatic extrem e rapid e qu’auec ua origina non terrèstra”.
Eth cambiament climatic qu’era còla de Kennett vò soslinhar ei era ipotèsi coneishuda coma era tustada deth Joen Dryas, un episòdi de cambiament climatic que provoquèc ua extincion generau dera nomentada megafauna, ua casuda dera populacion umana e er espandiment deth huec en mès d’ua region dera planeta. A mès, provoquèc qu’eth clima en er emisfèri nòrd venguesse lèu fòrça mès heired e umit. Tot açò demorèc enregistrat hè annades en diuèrsi depaus fossils de tota era Tèrra.
Totun, qu’ei encara ua ipotèsi pr’amor que diuèrsi scientifics non accepten que tot aguest cambiament climatic auesse ua causa cosmica (çò ei dehòra dera Tèrra) e encara afirmen qu’eth començament dera edat actuau que demorem aué, er olocèu, a ua origina totauments terrèstra. Ara era còla de Kennett podec trapar un cratèr de mès de 31 quilomètres de radi en Groenlàndia qu’auec coma causa era casuda d’un meteòr e que se passèc hè justaments 12.800 annades.
Era teoria dera tustada cosmica
Era còla de Kennett, dirigida peth paleontològ chilen Mario Pino trapèc, a mès, diuèrses pròves que serien era origina d’aqueth cambiament climatic que se passèc hè aperaquí 13.000 annades, mès ara en America deth Sud. Es pròves sigueren trapades en 41 grads de latitud sud e açò serie ua evidéncia qu’aqueth cambiament environamentau se passèc en tota era planeta e non solament en emisfèri nòrd.
Era descobèrta comencèc hè annades quan ua còla de cercaires chilens estudiauen es depausi paleontologics deth Quaternari en Pilauco Bajo, ua estacion arqueologica restacada damb eth Joen Dryas. Trapèren que hè 12.800 annades i auec ua lèu desaparicion dera megafauna e tanben dera vegetacion e d’utís umans.
“Era recerca podec trapar nautes concentracions de platin e aur e tanben de fèrre que non se trapen normauments ena natura – çò confirmèc Kennett. Tanben trapèren cròme. Era conclusion ei qu’era origina de tot açò solament podie èster extraterrèstra”.
Segontes aquera còla i aueren huecs generalizadi e eth cambiament climatic se passèc solament en pògues annades. Totun, qu’es condicions climatiques deth Joen Dryas sigueren desparières en America deth Sud. En er emisfèri nòrd eth clima venguec mès heired e umid. En America deth Sud se passèc çò de contrari. Eth clima venguec mès caud e sec.
Tot açò siguec trapat en Pilauco Bajo, en Chile, a mès de 6.000 quilomètres des auti lòcs estudiadi ja en aqueth continent. “Pr’amor d’açò pensam qu’er episòdi climatic deth Joen Dryas, que se passèc hè 12.800 annades non siguec un hèt locau o regionau mès totauments mondiau, çò soslinhèc Kennett”.
“Maugrat qu’encara cau estudiar es cambiaments atmosferics e oceanics pendent eth Joen Dryas, aguestes pròves demostren que siguec un hèt globau, çò afirmèc Kennett, e que provoquèc cambiaments extrems ena vida dera fauna e des umans dera epòca. Pilauco Bajo n’ei ua pròva mès e fòrça solida”.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
