DEPREDADORS SOCIAUS

Ua equipa de cercaires analizèc es uassi dera anca d’un des tigres de dents de sable mès coneishuts dera preïstòria, Smilodon fatalis. Eth resultat siguec era confirmacion qu’era displasia siguec ua malautia abituau en aguesti animaus fossils. Mès tanben podec èster confirmat que sigueren depredadors sociaus pr’amor que, quan un d’aguesti patie aquera malautia, d’auti especimèns d’smilodon l’ajudèren a subervíuer mès temps.

Smilodon fatalis demorèc en America entre ara hè aumens 50 000 annades e 11 000 annades. Auec ua mesura giganta e açò vò díder que minjaue erbivòrs tanben gigants coma eth bisont prei storic o diuèrses espècies de camèu. Pr’açò auec de besonh ues anques fòrça sanes, pr’amor que, se patie displasia, non podie caçar mès. Eth darrèr estudi hèt sus aguesta espècia depredadora preistorica americana demostrèc que diuèrsi especimèns podèren subervíuer dempús de desvolopar era malautia pr’amor dera ajuda d’auti smilodon.

Er especimèn d’smilodon estudiat patic ua displasia prigonda. “Ei er esquelet mès susprenent qu’auem trapat al Rancho de la Brea, a Califòrnia, çò diguec Mairin Balisi, deth Musèu d’Istòria Naturau de Los Angeles. Era patologia ère fòrça desvolopada e, maugrat tot, podec subervíuer enquiara edat adulta, çò que demòstre qu’auec era ajuda d’auti smilodons. Siguec un especimèn que jamès podèc caçar pr’amor d’aquera displasia”.

Felins diferents des actuaus

“Se poirie pensar que demorèc tot solet ena natura, çò apondèc eth cercaire american-. mès subervisquec, e açò vò díder qu’es smilodon demorauen en familha e qu’auien un comportament sociau. Mès açò hè d’smilodon un felin diferent des leons o tigres actuaus pr’amor qu’eth leon ei eth solet felin actuau qu’ei sociau. Autes espècies com eth tigre o eth jaguar non son sociaus”.

Aguest non ei eth prumèr còp qu’es paleontològs pensen qu’smilodon siguec un depredador sociau pr’amor que trapèren d’esquelets fossils qu’auien herides que demostrauen que non poderen subervíuer sens era ajuda d’auti smilodons. “Auem trapat evidéncies enes uassi e dents que demòstren qu’Smilodon fatalis recebec ajuda dera sua familha e que siguec suenhat aicí, en Califòrnia, mès tanben en d’auti lòcs, com en Corralito, en Eqüator”.

Er estudi ei important tanben pr’amor que demòstre com evolucione era vision qu’es paleontològs an des animaus extinguits com Smilodon fatalis. E tot gràcies as naues tecnologies. Es uassi d’aguest especimèn d’smilodon sigueren estudiats durant mès de 100 annades mès sonque siguec ara que, damb era ajuda des naues tecnologies, es scientifics poderen compréner qu’aguesti depredadors preïstorics sigueren sociaus e que, çò de mès segur, ei que cacèssen en grop. Er estudi siguec publicat en jornau en linha Scientific Reports ongan.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita