Brussèlas, capitala de l’UE, vòl ara mai d’avions antiincendis e tanben un centre europèu de formacion de pompièrs en Chipre. La Comission Europèa apelèt los estats membres a melhorar la prevencion, la cooperacion e las responsas pr’amor del naut risc, cada còp màger, de fuòc dins la forèst.
Pasmens, de crear tot aquò demandarà d’ans. E lo risc de mai de fuòcs dins los bosques europèus es màger cada an. La causa primièra es lo cambiament climatic. En 2025 brutlèron mai d’un million d’ectaras de bòsc. Aquò es fins a tres còps mai que la mejana dels darrièrs 20 ans. Una superfícia tan granda coma Belgica o Chipre. Lo problèma pòt entraïnar de consequéncias economicas grèvas e tanben environamentalas e socialas. Per aiçò la Comission vòl crear una estrategia per luchar de biais mai coordenat contra aquel tipe de catastròfas que son pas pus res d’excepcional.
Una melhora coordinacion
Per la Comission, cal poder melhor partejar l’informacion e se coordenar a totes los nivèls: local, regional, estatal e mai europèu. Cal tanben poder aver mai de material e mai de mejans umans s’òm vòl ganhar la lucha contra lo fuòc. E lo camin per o poder far es aver mai d’avions e d’elicoptèrs antiincendis dins l’UE. En formant de melhors pompièrs.
«Cal èsser prèst abans lo fuòc, çò diguèt la vicepresidenta encargada dels dreches socials e de la preparacion de l’UE, Roxana Minzatu. E aquò vòl dire aver una vertadièra cultura de la preparacion, amb mai de personas, mai competentas e un màger sosten als pompièrs».
Totes los instruments an d’èsser a disposicion de totes los estats membres amb una flòta d’avions antiincendis mai fòrta, mai preparada. Cal aver abans la fin de 2028 12 avions mejans de mai, e cinc elicoptèrs de mai. Lo primièr d’aquestes já serà disponible en Romania, ont s’embranda fòrça fuòcs cada an. Los nòus avions se destinaràn a l’estat espanhòl, a Portugal, als estats italian e francés, a Croàcia e Grècia. Los elicoptèrs, pasmens, aniràn en Eslovaquia, Republica Chèca e Romania.
L’UE demanda tanben la creacion d’un centre europèu de lucha contra lo fuòc en Chipre, ont se formarà los pompièrs amb de simulacres e mai de preparacion per la sason dels incendis. Un centre que melhorarà la capacitat europèa mas tanben ajudarà plan mai lèu las urgencias dels fuòcs boscassièrs.
Segon la Comission, mai de pompièrs seràn desplegats dins las zònas de risc e se vòl mai d’escambis d’expèrts en extincion de fuòcs. Per aiçò Brussèlas vòl ara començar un estudi sus l’exposicion dels pompièrs al fuòc e suls efièches que ne pòdon resultar per la santat umana.
Tanben se demanda d’aver mai d’espacis naturals resistents al fuòc. L’estrategia es pas una obligacion pels estats membres mas una proposicion estrategica. E per aiçò cal restaurar mai d’ecosistèmas, e especialament de territòris umids. De practicas tradicionalas coma lo pasturatge o lo fuòc contrarotlat an d’èsser encoratjadas. Aital i aurà mens d’èrba e mens de vegetacion en general que pòsca puèi èsser brutlada.
«De resistir economicament coma europèus es ligat a la santat dels ecosistèmas e de protegir un es protegir l’autre, çò afirmèt la comissària d’Environament, Jessika Roswall. Mai de prevencion e de restauracion vòl dire aver mai de territòri resistent al fuòc. Si que non, las pèrdas economicas seràn gigantassas».
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Ervins Strauhmanis/CC
