Es problèmes detectadi pes astronautes qu’avien demorat longtemps en espaci èren vision fatigada, edèma papillar e compression deth glòbe ocular
An detectat problèmes visuaus enes astronautes. Pas en toti, mès ua còla d’engenhaires biomedicaus e radiològs dera Universitat dera Escòla de Medecina Miller de Miami a detectat qu’es astronautes que son estats en missions de longa durada en espaci pòden aver problèmes visuaus. Era arrason serie eth cambiament de gravetat qu’afectarie era pression deth glòbe ocular.
Hège temps qu’es astronautes qu’avien participat en missions dera NASA pendent fòrça temps didien qu’avien problèmes ena vista dempús de tornar ena Tèrra. Era recèrca, qu’a hèt era còlha deth doctor Noam Alperin, a podut descobrir qu’aquerò provocarie problèmes visuaus coma pèrta de vision originadi a causa de cambiaments en liquid cerebrospinau e tanben de modificacions de volum d’aqueth liquid, que hè coma un coishin entre eth cervèth e eth medòth espinau en tot hèr circular neuriments entar uelh.
Es problèmes detectadi pes astronautes qu’avien demorat longtemps en espaci èren vision fatigada e tanben d’auti coma edèma papilar e compression deth glòbe ocular qu’afectaven es uelhs e tanben es nèrvis optics (desviacion dera vision e plecs visuaus). Tot aquerò èren senhaus d’ua pression intracraniana mès nauta.
Aguesta sindròme, coneguda pes sègles en anglés de sindròme de VIIP l’avien mès de 2 tresaus des astronautes qu’avien estat ena estacion Espaciau Internacionau (ISS). Enquia aué se pensave qu’aquerò ère relacionat damb era microgravetat der espaci.
Ua auta causa ei era origina
Mès era còlha scientifica d’Alperin a podut detectar ua auta arrason: eth liquid cerebrospinau. Agueth sistèma uman ei dessenhat entà arturar es cambiaments fòrts dera pression. “Ena Tèrra —çò diguec Alperin— aqueth sistèma corporau arture es cambiaments de pression mès en espaci i a ua confusion des organs pr’amor qu’es cambiaments de pression son abituaus”. Entà descobrí’c, aquera còlha a hèt divèrsi escannèrs cerebraus as astronautes de longa durada de 7 missions espaciaus. Dempús an utilizat divèrsi algoritmes fòrça complicats e an podut trapar modificacions ena estructura visuau umana e tanben d’aqueth sistèma cerebrospinau.
Per arrepòrt as astronautes qu’an passat pòc temps en espaci, se detectèc ua inflamacion des boles des uelhs e tanben deth nèrvi optic. “Es astronautes que son en espaci fòrça temps pòden patir ua inflamacion der indèx deth glòbe ocular de p<0,00001 e tanben deth nèrvi optic —çò soslinhèc Alperin—. Totun, s’a trapat pas cap de modificacion enes volums dera matèria grisa ne blanca deth cervèth en cap d’astronauta”.
Per tant, er estudi balharie per prumèr còp evidéncies des efèctes de longa durada en espaci enes umans. E s’a considerat que calie identificar era origina d’aqueri cambiaments oculars entà desvolopar contramesures entà protegir es astronautes qu’auràn de demorar longtemps ena microgravetat.
“Se non s’avessen cap identificat aqueres deformacions lèu es astronautes patirien damatges irreversibles enes sòns uelhs pr’amor que s’er uelh s’inflame encara mès es astronautes poirien patir ipermetropia o ua marrida vision ath luenh. Er estudi s’a publicat aguest noveme passat ena reünion anuau dera Societat Estatsunitenca de Radiologia que se debane en Chigago.
Era Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
