De scientifics estudièron mai de 35.000 bessons del registre suedés. La tòca èra veire se i podiá aver de diferéncias geneticas a l’ora d’aver un can. L’estudi fach a de conclusions tras qu’estonantas pr’amor que mai del 50% de las variacions geneticas trapadas explicavan l’influéncia individuala a l’ora d’aver (o pas) un can.
Apuèi mai de 15.000 annadas (quora l’òme modèrn e lo can bastissèron l’union actuala qu’an ambedoas espècias) lo can es vengut un dels animals de companhia mai aimats per la nòstra espècia. Los proprietaris de cans vivon melhor e mai d’annadas. Lo benefici mental e biologic que balhar aver un can èra un mistèri que la còla scientifics que realizèt aquel nòu estudi voliá descobrir. Caliá saber se i aviá o pas de rasons geneticas.
“Foguèt estonant descobrir se la genetica d’un individú aviá d’influéncia a l’ora d’aver un can. La tròba qu’avèm fach a d’implicacions importantas en divèrses airals, çò diguèt Tove Fall, cap de l’estudi e de l’Universitat d’Uppsala. Es lo començament del camin per comprene la relacion a travèrs de l’istòria entre ambedoas espècias. Benlèu i a de personas qu’an una propension innata per aver de cans o d’autres animals. E aquò s’es demostrat qu’es genetic”.
De causas geneticas
Segon Carri Westgarth, coautor d’aquel estudi, la tròba suggerís que los beneficis per la santat que balha aver un can pòdon èsser explicats per de diferéncias geneticas entre d’umans. Totun, un estudi mai prigond es de besonh per poder identificar qualas son aquelas diferéncias geneticas.
“Encara sabèm pas quals gèns o provòcan, çò afirmèt Patrick Magnusson, epidemiològ e autor de l’estudi. Totun, qu’avèm podut confirmar que la genetica e l’environament an de ròtles parièrs a l’ora d’aver o pas un can”.
La descobèrta, publicada al numeric Scientific Reports, poiriá donar mai coneissença sus perqué i a de personas qu’aiman los animals (la majoritat de l’umanitat los aima pas) e d’autres òc. E se açò poiriá èsser lo principi d’una diferenciacion genetica coma espècia, restacats amb los autres. Dich d’una autra manièra; aimam los cans pr’amor que nòstres ancessors atanben o faguèron. Aquò nos fa desparièrs?
La Redaccion
