De nòvas tras qu’estonantas arriban d’Índia. Segon un darrièr comunicat de l’armada indiana serián estadas trapadas de piadas de ièti. En mai d’un rapòrt oficial, la nòva arribèt tanben per Twitter ont de fonts oficialas d’aquela armada confirmèron aver trobat de piadas misteriosas de la mitica bèstia sonada ièti al camp basa de Makalu.
Alavetz, e malgrat l’estonament general de la populacion e qu’encara es pas jamai estada trapada cap de pròva de l’existéncia de l’òme de la nèu, la confirmacion de l’armada indiana es tras que polemica. Totun, apondèron de fòtos de las piadas.
Segon l’armada indiana, lo fach se passèt pendent lo mes d’abril mas volguèron pas balhar de publicitat a l’afar fins ara. Es çò que tanben foguèt publicat dins divèrses mèdias, coma lo jornal Times of India mas tanplan la BBC britanica. Segon las meteissas fonts, de cercaires foguèron interrogats sus aquelas fotografias. L’armada indiana afirmèt puèi qu’avián decidit de rendre public l’afar a l’ora d’ara pr’amor que volián ajudar la sciéncia internacionala.
Un animal fins ara legendari
Malgrat las fotografias, jamai fins ara cap de scientific confirmèt pas l’existéncia del ièti. En 2013, una recèrca realizada per un cercaire britanic aguèt coma conclusion qu’aquela bèstia podiá ben èsser un tipe d’ors brun. D’autres encara (mas sens pròvas scientificas) diguèron que poiriá èsser un grand monin luenchencament aparentat al grand orangotan escantit Ramapithecus.
Aital, e malgrat que i aja fòrça mond dins l’airal qu’encara creson que lo ièti existís (de mens en mens, tanben o cal dire ) de cercaires importants an confirmat que cap de monin poiriá pas demorar dins un luòc ont i a pas de frucha pendent tota l’annada e que sonque viuriá dins d’airals tropicals.
Mas la cresença en d’èssers coma lo ièti contunha dins cèrtas regions d’Índia e de Nepal, coma d’unes creson en lors cosins lo grandpè en America del Nòrd e encara lo Chuchunya, un èsser tanben fins ara legendari que demorariá entre los flumes Iana e Indigirka siberians e que, segon lo director de l’Acadèmia d’Iacotia, seriá lo darrièr aborigèn paleoasiatic siberian.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
