TIKTOK MENAÇAT
L’aplicacion d’Internet TikTok es de mai en mai menaçada per la Comission Europèa, mas tanben pel Senat estatsunidenc. Car i a plan mai d’expèrts que creson que pòt aver una influéncia plan negativa sus la santat mentala de las gents, en mai de presentar una pro marrida seguretat de las donadas personalas.
D’efièch, se d’un costat ja plusors estats d’Estats Units an denonciat TikTok, la Comission Europèa a dobèrta una enquista sus l’aplicacion per avalorar l’influéncia que la pòt aver sus la santat mentala dels individús que la vesitan sovent, pr’amor qu’es estat denonciat lo fach que TikTok auriá per tòca de provocar que las personas passèsson plan mai de temps dins l’aplicacion.
Dins los estats espanhòl e francés, per exemple, TikTok Lite balhariá de prèmis als que demòran mai longtemps dins l’apliacion. E cal saber s’aquò es legal o pas. Mai que mai se ramentam que la majoritat de las personas que fan servir TikTok son d’adolescents.
Aquò, per la Comission Europèa, genèra « de grands risques per la santat mentala dels utilizaires de TikTok ». En mai d’aquò, TikTok a pas estudiat los eventuals risques per la santat abans de lançar l’aplicacion, malgrat lo nòva lei europèa suls servicis numerics europèa (DSA, Digital Services Act), en vigor dempuèi lo 17 de febrièr d’ongan.
E als Estats Units
Sus l’autra riba de l’Atlantic, lo Senat estatsunidenc a adoptada una nòva lei qu’exigís de TikTok de rompre los sieus ligams amb l’entrepresa maire chinesa ByteDance. Si que non, poiriá èsser enebida als Estats Units lèu. La menaça sus la seguretat de las donadas d’aquela aplicaion tanben inquièta lo govèrn estatsunidenc. Car i a una relacion clara entre TikTok e d’autras aplicacions tecnologicas chinesas (dont qualques unas apertenon dirèctament al govèrn de China).
TikTok a ja mai d’1,5 miliard d’utilizaires dins lo Mond, e l’entrepresa, après conéisser l’adopcion de la nòva lei estatsunidenca, a afirmat que son enebicion provocariá sonque una ataca a la libertat d’expression de milions d’estatjants dels Estats Units.
Cossí que siá, las accions de la Comission Europèa e del Senat estatsunidenc poirián grèvament menaçar Tiktok, pr’amor qu’aquela aplicacion tanben seriá una menaça sus las personas. I a, a l’encòp, la question de la seguretat de las donadas e l’efièch de las vesitas de mai en longas de l’aplicacion.
Regular Tiktok als Estats Units e en Euròpa, doncas, seriá lo primièr pas vèrs un màger contraròtle dels gigants tecnologics mondials que pòdon provocar, a l’escala mondiala, de cambiaments involontaris de las personas e de las lors accions dins la vida vidanta. Es per aquò qu’es necite d’adoptar una regulacion estricta.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Nordskov Media/CC
