La planeta Tèrra arribèt ja als 8 miliards d’umans. Es la resulta logica de la creissença demografica plan fòrta de l’umanitat pendent la segonda mitat del sègle XX e lo sègle XXI. La chifra foguèt confirmada per Nacions Unidas fa gaire.
Pasmens, pas totes los organismes internacionals i son d’acòrd. Segon lo cercaire del Departament de Geografia de l’Universitat Autònoma de Barcelona (UAB) Antonio López Gay, “pas dengun pòt uèi afirmar que ja sèm 8 miliards d’umans a la planeta. La chifra es mai simbolica que reala. Benlèu ja i sèm o benlèu i arribaram lèu. La diferéncia pòt ésser de meses ».
La majoritat d’organismes pensan que se pòt arribar plan a aquela chifra amb l’ajuda de fònts oficialas de populacion mas tanben en tot conéisser lo nombre de naissenças e lo nombre de mòrts annadièrs. “Los païses amb mai d’argent an de chifras pus realas. En d’autres cases, totun, las chifras son pas gaire realas pr’amor que i a pas cap registre o lo darrièr es de fa 10 annadas, çò contunhèt López Gay ».
Cossí que siá, la populacion mondiala patiguèt una fòrta cresissença encara la darrièra decada. Segon l’ONU « es una cresissença que jamai passèt abans a la planeta pr’amor que l’espèr de vida es màger, i a plan melhor santat e nutricion, igiène e medecina. E los nivèus de fertilitat en qualcunes païses son tras que nauts.
Sonque 11 ans
Aital, la populacion mondiala passèt de 7 miliards d’umans a 8 miliards en sonque 11 ans. Per contra, l’ONU pensa qu’arribarèm pas als 9 miliards abans de l’an 2037. E, per ansin, aquela creissença cambiarà lèu e vendrà mai lenta.
Pendent la decada de 1960 la creissença mondiala foguèt del 2,2 %. Uèi, totun, la creissença es del 1,1%. En 2022 la creissença foguèt de sonque un 0,8%. A mai, l’ONU pensa que la populacion mondiala de la planeta arribarà a mai de 10 miliards d’abitants en l’an 2080.
De remembrar que los païses amb mai populacion de la planeta son ; China, amb 1.410.539 milions d’abitants, Índia amb 1.389.637 milions, Estats Units, amb 332 milions d’abitants, Indonèsia amb 277 milions, Paquistan, amb 242 milions d’abitants, Nigèria amb 225 milions d’abitants, Brasil, amb 217 milions, Japon, amb 124 milions, Filipinas amb 114 milions e Etiòpia, amb 113 milions d’abitants.
La Redaccion
