Segon un estudi publicat fa gaire dins Nature, s’es pogut confirmar una relacion dirècta entre los natius americans d’Amazonas e los indigènas d’Australasia. Lo genòma descobèrt parla d’una migracion desconeguda en America fa de milièrs d’ans. Mas se sap pas encara per ont.
“Es estat estonant – çò diguèt David Reich, cap de l’estudi -. L’arqueologia d’uèi encara afirma que i aguèt solament una migracion vèrs America fa 15 000 annadas. E se son enganats. Avèm fach una fauta plan importanta en estudiant las donadas originalas”.
Tot començèt en 2012, quand un collèga de Reich, Pontus Skoglund, estudiava de donadas geneticas e trobèt que ja i aviá plusors gèns semblables entre dos grops de natius americans brasilièrs e d’indigènas que demòran en Austràlia, Nòva Guinèa e las Illas Andaman.
“Foguèt una descobèrta mai qu’estonanta pr’amor qu’èra pas de creire – çò diguèt Reich -. Estudièrem pendent fòrça temps las resultas e cada còp que o fasiam lo gèn èra encara mai fort”.
Un estudi que l’an ajudat plusors universitats
Las resultas èran solidas mas tanben estonantas. Reich e la siá còla de scientifics demandèron d’ajuda a divèrsas universitats americanas. Aital, poguèron confrontar l’informacion genetica de 21 populacions de natius americans d’America Centrala e del Sud amb d’autras 200 non americanas. Lo gèn desapareissiá pas. Los suruís, que parlan tupí, e los shavantes, locutors de gê, avián d’ancessors restacats amb d’australasiatics. Mai que cap autra populacion uèi lo jorn. Cap migracion posteriora europèa, africana o polinesiana o podiá pas explicar.
Los ancessors foguèron nomenats Populacion Y pr’amor de la paraula tupí ypykuéra (ancessor). Puèi Reich, Skoglund e los sieus collègas faguèron una nòva proposicion: la Populacion Y èra una de las doas primièras populacions qu’arribèron a America.
Ara cal far mai d’estudis pr’amor que cal determinar quin percentatge d’eiretatge de Populacion Y aquestas populacions de natius americans brasilièrs d’Amazonas an en elas. Mas cossí o far s’aqueste genòma existís pas pus ?
Benlèu se poiriá far amb d’analisis d’esqueletas de natius americans brasilièrs pr’amor qu’en Asia aqueste gèn se pòt trobar solament en Australasia. Mas lo genòma Y existís pas pus uèi lo jorn en aquesta region. Es pas estat trobat. Cal far encara mai d’analisis geneticas. L’estudi a agut lo supòrt de 7 instituts de sciéncia americans.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
