Las personas que van dormir tard an mei de pensadas negativas que las personas qui dormen regularament. E los qu’an pensadas negativas an tendéncia de despresar la lor pròpia experiéncia – que son enqüèra mei pessimistas. Mes ua solucion qu’existeish: dromir mei.
Qu’ei lo subjècte deu navèth estudi realizat sus mei de 100 estudiants de l’Universitat de Binghampton, en Nòva York, e qu’estó publicat en la revista Cognitive Therapy and Research. L’estudi que confirma que las personas qu’an hèra de preocupacions suu futur e qui pensan tròp au passat qu’an fin finala pensadas mei negativas.
Aqueras pensadas que poderén miar dinc a la malaudia com desordis d’ànsia generalizada, desordis depressius màgers, desordis d’estrès posttraumatics o desordis compulsius obsessius e d’ànsia sociau. E tot aquò ei ligat au hèit de dromir drin.
Dromir drin n’ei pas bon.
L’estudi qu’estó un questionari au quau mei de 100 estudiants universitaris arresponón. L’equipa que’u realizè que podó atau conéisher quinas èran las personas qu’avèvan mei de preocupacions o d’obsessions. E tanben que podó detectar que tot aquò èra ligat a un tipe de persona : las personas qui dromivan regularament e las personas que non ac hasèvan pas.
Las conclusions de l’estudi qu’estón que las personas que dormivan drin e qui se n’anavan dromir mei tard qu’avèvan mei de pensadas negativas que las autas. E las personas que con·hessavan qu’èran personas deu dia e pas de la nueit n’avèvan pas tant de pensadas negativas, ni tant de preocupacions com las autas.
Fin finala dab aquò, l’equipa scientifica qui hasó aqueth estudi, que prepausè de dromir mei e regularament pr’amor atau n’averén pas tant de pensadas negativas. Tanben que podón soslinhar que trencar lo som qu’èra tanben ua causa de las pensadas negativas.
Pr’amor de tot aquò los scientifics que cranhen qu’aqueth tipe de personas e podin desvolopar, dab lo temps, un tipe o aute de desordi dab pensadas enqüèra mei negativas, e que tot aquò hací’us dromir enqüèra mensh.
Redaccion
