Home PALEONTOLOGIA AN DESCOBÈRT UNA NÒVA ESPÈCIA DE TITANOSAURE
AN DESCOBÈRT UNA NÒVA ESPÈCIA DE TITANOSAURE

AN DESCOBÈRT UNA NÒVA ESPÈCIA DE TITANOSAURE

0

Una còla de paleontològs a trobat de tròces fossils de l’esqueleta de çò que ja es estat confirmat coma una nòva espècia de sauropòde titanosaure que viviá fa aperaquí 80 milions d’ans. La descobèrta es estada facha en Egipte e ja a cambiat lo vejaire suls dinosaures africans.

Son estadas trobadas de partidas del crani, la maissa, lo còl e plusors vertèbras e tanben de tròces del pè e de las costèlas.

Lo titanosaure es estat nomenat Mansourasaurus shahinae e fasiá partida d’un grop de sauropòdes (animals del còl long e erbivòrs) pendent lo Cretacèu en aquela epòca. Los paleontològs an trobat lo fossil de son esqueleta prèp de l’oasi de Dakhla, dins lo desèrt occidental egipcian.

Lo classament de l’esqueleta es estat realizat pel paleontològ de l’Universitat de Mansoura e d’autres collègas, qu’an determinat qu’aperten a un nòu genre e espècia de titanosaure, desconegut fins a uèi lo jorn.

Una esqueleta fòrça completa

“L’esqueleta de Mansourasaurus es fòrça importanta pr’amor qu’es lo dinosaure mai complet del Cretacèu jamai trobat en Africa –çò diguèron los paleontològs–. Son estadas trobadas de partidas del crani, la maissa, lo còl e plusors vertèbras e tanben de tròces del pè e de las costèlas”.

Segon la còla que l’a classat, sa descobèrta foguèt pro estonanta pr’amor qu’èra una tòca que los paleontològs africans, e de la planeta tota, fasiá de temps que cercavan. Aquò es aital pr’amor de la relacion entre los dinosaures africans e los dinosaures d’autres continents. E l’opinion scientifica que i a encara uèi sus aqueles dinosaures.

Al començament de l’epòca dels dinosaures, dins los periòdes dels Triassic e Jurassic, totes los continents èran amassats dins un supercontinent sonat Pangèa. Pasmens, pendent lo Cretacèu (l’epòca finala dels dinosaures) los continents comencèron de se desseparar. Dempuèi d’annadas se sabiá pas cossí Africa èra restacada amb los autres continents e sustot Euròpa. Un fach que poiriá èsser important dins l’evolucion d’aqueles animals.

La còla de paleontològs de l’Universitat de Mansoure, en Egipte, qu’a fach la descobèrta.

Ara Mansourasaurus es un dels pauques dinosaures africans que pòt donar una responsa a aquela question. Seriá una espècia clau pr’amor que pòt balhar fòrça responsas sus los dinosaures d’aquela epòca e tanplan sus la paleobiologia del moment.

En tot analisar la forma dels òsses d’aquel dinosaure los paleontològs an determinat que Mansourasaurus shahinae es mai pròche dels dinosaures europèus e asiàtics que non pas dels sud-africans o sud-americans que son ja estats trobats abans. Aquò demostrariá que qualques dinosaures se podián desplaçar entre Africa e Euròpa a la fin d’aquela epòca.

“Los dinosaures africans e sustot los darrièrs dinosaures d’aquel continent èran pas isolats –çò diguèt Eric Gorscak del Musèu Field–. Es un vejaire nòu e contrari a çò que la paleontologia a prepausat fins ara. I avián de ponts de tèrra amb Euròpa”. L’estudi es estat publicat dins la revista Nature Ecology & Evolution.

 La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *