VOLETZ MINJAR VÈRMES ?

Era adopcion per lei dera Union Europèa dera transformacion deth vèrme dera haria en aliment uman poirie daurir un nau camin entara alimentacion umana pr’amor qu’es insèctes poirien vier una naua hònt de proteïnes entath futur dera nòsta espècia. E ja i a empreses qu’an començat a preparar-se tà véner aguest nau producte. Eth problèma, aué, encara, son es reticéncies dera majoritat de nosati entà minjar vèrmes.

Tot arribèc en 2014 quan des dera empresa Tebrio, en estat espanhòu, comencèren a trapar qu’en futur era umanitat patirie una fauta de proteïnes gigantassa; enquia 200 milions de tones, e açò pr’amor que sonque utilizam es animaus dera cadia superior d’alimentacion. E pr’açò comencèren a trabalhar ena transformacion deth vèrme dera haria en aliment uman.

Ua nauta hònt de proteïnes

Eth vèrme dera haria ei un aliment fòrça naut en proteïnes. Dempús d’èster processat pòt èster utilizat coma aliment uman, coma fertilizant o encara en mercat des cosmetics. Aué tota era empresa de Tebio a era tecnologia que cau entà poder transformar ben es vèrmes dera haria, dempús dera adopcion recenta per lei europèa dera sua transformacion.  E comencèren a produsir e transformar industriaument aguesti insèctes ja en 2021.

Aué, aquera empresa, que comencèc damb un capitau de sonque  8 000 euros, da trabalh a mès de 20 trabalhadors e barrarà er exercici annadèr de 2021 damb ingresi superiors as 700 000 euros. Totun, que tot çò que guanhen ei reinvertit un aute còp en melhor tecnologia empresariau. Escuelheren eth vèrme dera haria, mès que mès, pera sua estructura biologica.

A mès d’açò, es vèrmes dera haria an ua proteïna que pòt èster minjada en 99% des casi. E eth vèrme dera haria ei un animau facil entà èster processat industriament pr’amor que tanben auien pensat ena mosca soldat nera, mès non podien hèr productes de nauta qualitat damb aguest animau.

Eh cicle de vida des vèrmes dera haria demore aperaquí 6 mesi. Tot comence damb es ueus que vien larves. En aguest moment ei quan se pòt extrèir es sues proteïnes e es lipids bons. Segon es directors d’aquera empresa eth grèish deth vèrme dera haria ei fòrça ric en acids insaturats e donques pòt èsser comparat damb er òli d’oliva e tanben er òli deth virassolei.

Es excrements deth escarabat que vien dempús de gésser dera larva pòt èster usat com fertilizant que protegís es plantes de diuèrses plagues. Tanben pòt èster utilizat com aliment entà peishi, audèths, pòrcs e animaus de companhia. Mès tanben pòt èster venut a empreses cosmetiques. Deth vèrme dera haria òm pòt tanben extrèir era quitina, çò ei un ingredient fòrça idratant usat en diuèrsi productes de limpiesa dera pèth e suenhar eth peu.

Totun, non hè guaire mesi qu’era Union Europèa adoptèc ua naua lei entà hèr deth vèrme dera haria un producte entara alimentacion umana. Entà poder hèr açò es empreses an d’enviar un rapòrt entara Autoritat Europèa, que pòt dempús autorizar era sua venda. Totun, era nòsta cultura ei encara reticenta a aguest tipe d’aliments.

“En Euròpa, çò digueren des dera direccion d’aquera empresa, auèm ua cultura que ditz qu’es insèctes son quauquarren dolent. Non ei atau en Asia o America deth Sud. Pensam qu’eth vèrme dera haria pòt èster venut com aliment, mès coma producte foncional, çò ei entà ajudar es esportistes a auer un melhor rendement damb batuts e barretes energetiques”.

Dilhèu pr’açò empreses com Tebrio se preparen ja entà bastir un gran complèx biotecnologic en 2023  e poder lençar mès de 100 000 tones d’aguest producte de manèra annadèra damb ua inversion de mès de 50 milions d’euros. Se aguest tipe d’empreses capite o non açò ja ei un ahèr qu’encara cau vèir pr’amor qu’era majoritat de nosati auèm un pòc de hàstic quan pensam a minjar insèctes, o …vèrmes.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita