UN VIATGE PERILHÓS
Viatjar per espaci ei perilhós. Eth perilh non se desvolope sonque ara ora de gésser dera planeta o d’i tornar. Tanben n’i a fòrça mès pendent era mission espaciau. I a perilh de radiacion cosmica, problèmes damb era gravetat, o encara cèrts problèmes mentaus que poden arribar aus astronautes après eth madeish viatge espaciau.
Pr’amor que, viatjar en er espaci ei un ahèr fòrça delicat e tanben perilhós. E poder assegurar eth benestar des umans en espaci ei tanben un objectiu de tota mission espaciau. Non cau díder qu’aguesti perilhs seràn mès e mès grans segontes es viatges espaciaus, pr’amor qu’es astronautes son enviats mès e mès luenh.
Es perilhs son diuèrsi : nauta exposicion a radiacion cosmica, problèmes ara ora de viatjar ua persona soleta pendent setmanes, era microgravetat, o encara er isolament mentau des persones. E cadun d’aqueri perilhs poden provocar grèus problèmes as viatjaires espaciaus. Mès encara quan son factors qu’arriben, normauments, amassa e jamès isolats.
Es viatges longs
Ara, era NASA confirmèc que i a enquia cinc grèus perilhs entàs astronautes en cada mission espaciau. E que cau trabalhar plan entà arrestar-los. Nosati auem evolucionat ena Tèrra e donques non auem jamès patit problèmes pr’amor dera radiacion cosmica. Aicí auem era atmosfèra, que mos protegís plan des particules e eth camp magnetic espaciau, que non arriben jamès enquia nosati. Maugrat açò cada annada recebem cèrta radiacion cosmica que non ei perilhosa entàs èsters viui dera planeta pr’amor qu’auem evolucionat entà poder i convíuer.
Mès en dehòra dera planeta aguesta ei enquia cinc còps mès grana e tanben fòrça mès perilhosa. Es astronautes dera Estacion Internacionau Espaciau non an proteccion atmosferica e receben enquia 10 còps mès de radiacion que nosati. E açò ei fòrça mens que se siguèssen en un viatge espaciau. Entà arrestar aquera radiacion sonque podèm crear materiaus melhors e sistèmes d’alèrta bons entà protegir ben es astronautes.
Convíuer damb auti en un petit espaci tanben pòt èster un problèma grèu entàs astronautes. Se açò passe pendent fòrça temps. Un astronauta deu poder víuer ben damb era solitud, er isolament o er estranci provocat per víuer dins ua nau espaciau durant fòrça temps. Pr’amor qu’ua salut mentau perjudicada pòt entraïnar conseqüéncies negatives entara pròpria mission espaciau.
Mart ei a 225 milions de quilomètres dera Tèrra. Açò provòque viatges que poden demorar annades. E açò ja ei un problèma entàs astronautes pr’amor que, se i a ua urgéncia, tornar ara Tèrra vò díder un viatge de meses. Entà n’auer ua idèa cau saber que sonque es comunicacions entre era Tèrra e Mart demòren 20 menutes.
Era fauta de gravetat tanben ei un aute problèma entàs viatjaires der espaci. Demorar sonque 6 meses en microgravetat ena Estacion Internacionau Espaciau pòt provocar tanta pèrta de massa ossia e muscular coma era de dètz annades ena Tèrra. E acò tanben pòt víer un problèma grèu entath còr uman.
En Mart es astronautes viuràn un tresau mens de gravetat qu’ena Tèrra. Entà i lutar e auer tostemps ua bona salut es astronautes an de seguir un programa d’activitat fisica estonant. A mès d’açò, ena nau espaciau cau auer ua bona temperatura, bona pression, bona umitat, e bona lutz. Era dièta tanben dèu èster bona, e cau poder pausar-se ben cada dia.
Sens açò era salut umana des atronautes pòt víer fòrça dolenta, pr’amor d’aqueri perilhs plan reuaus qu’ara es cercaires umans comencen a descorbir. E poder lutar i tanben ei ara un des objectius mès grani dera administracion espaciau de toti es païsi que vòlen enviar astronautes ar espaci prigond.
Era Redaccion
