UN ESPINOSAURID IBERIC
De paleontològs descobriguèron una nòva espècia d’espinosaurid que sembla que demorèt en las illas situadas al nòrd del continent african. La tròba es importanta pr’amor que fins ara èra desconeguda la preséncia d’aquel tipe de carnivòr en defòra del continent african. E foguèt trapat a la peninsula iberica.
La nòva espècia es estada classificada amb lo nòm de Protathlitis cinctorrensis e foguèt descobèrta per Andrés Santos-Cubedo e una còla de paleontològs de l’Universitat Jaume Ir de Castelhon (País Valencian). Uèi es un nòu genre de la familha dels espinosaurids que sembla èsser de mai en mai divèrsa.« Los espinosaurids son dinosaures plan grands que marchavan de manièra bipèda e qu’èran carnivòrs, çò diguèt Santos- Cubedo. Qualcunes dels melhors exèmples d’espinosaurids son Spinosaurus e Baryonyx ».
Un origina europèa
Malgrat que lo primièr fossil de dinosaure espinosaurid foguèt descobèrt en Africa, los cercaires creson uèi qu’aquela familha de dinosaures carnivòrs s’originèt mailèu a Euròpa « e puèi se serián espandits per Africa e Asia. A la peninsula iberica, çò apondèt Santos-Cubedo, sonque avèm trapat qualcunas dents fossilas e pro ».
Totun, lo nòu espinsaurid iberic, Protathlitis, aufriguèt una maissèra, una dent e cinc vertèbras. Los fossils foguèron trapats a la Formacion d’Argilas de Morella, mai que mai a la comuna de Cinctorres (País Valencian). Los scientifics pensan qu’aquelas rèstas apertenon a un individú qu’arribava als 10 o 11 mètres de longor.
La confirmacion de la descobèrta d’aquel nòu espinosaurid a la peninsula iberica confirma doncas que las illas que i aviá a l’epòca entre Euròpa e Africa serián estadas un bon territòri per de dinosaures amb de mesuras mejanas e tanben grandas. E balha un pauc mai de lutz sus l’origina e evolucion de la granda familha dels espinsaurids. Segon los paleontològs ara se poiriá sospechar que los espinosaurids nasquèron pendent lo Cretacèu Ancian en çò qu’alara èra Laurasia – un grand continent septentrional de l’epòca – e que i aguèron aumens dos subgrops d’espinosaurids que demorèron a l’oèst europeu.
“Après l’arribada d’aquelas doas espècias d’espinosaurids qualcunes espinosaurids migrèron vèrs Africa e tanben Asia e foguèt ailà ont nasquèron mai espècias d’aquela familha de dinosaures. En Euròpa, çò confirmèron los cercaires, l’espècia baryonyx foguèt la pus espandida e en Africa sembla qu’Espinosaurus foguèt l’espècia mai abondanta ». L’estudi foguèt publicat al numeric Scientific Reports.
La Redaccion
