De nòvas estonantas pòdon arribar après çò que qualques unes ja dison qu’es la fin de la pandemia, almens en Euròpa. Ara, un nòu estudi, publicat dins lo celèbre numeric scientific PLOS One, a confirmat que lo nombre de personas que patisson çò que ja comença d’èsser conegut coma la covid permanenta es fòrça mai naut que çò que se podiá esperar. D’efièch, la resulta d’aquel estudi soslinha que pòt arribar al 25%, çò es una persona sus quatre afectadas per la covid-19.
Lo nòu estudi arriba après la realizacion d’una analisi de donadas suls subrevivents de covid pendent l’an 2020, lo primièr an de la pandemia mondiala. E la chifra es un pauc estonanta car es del 25%. Segon aquel estudi fins a una de cada quatre personas que la patiguèron son pas totalament garidas après mièg an e aquò pòt tanplan arribar fins a uèch meses après. L’estudi tanben fa conéisser çò que los medecins començan ja de nomenar la sindròme pòstcovid e qu’entraïnarà, de segur, una atencion mai nauta dels sistèmas europèus de santat sus aquelas personas pr’amor d’aquò.
L’estudi foguèt dirigit per Milo Puhan, de l’Universitat de Zuric, e confirma que la pandemia es pas solament un problèma grèu temporari de santat pels umans mas que tanben o pòt èsser longtemps puèi. E aquò es un problèma de mai que los sistèmas de santat continentals devon ara afrontar. De nòvas donadas, doncas, confirmarián que la malautiá pòt persistir durant de meses e pòt quitament aver de consequéncias grèvas pels umans, sustot al nivèl fisic mas tanben emocional. E aquò es un fach inquietant pels mètges.
Un estudi prigond
L’estudi analisèt la santat de mai de 431 personas que foguèron classificadas coma malautas de covid-19 entre febrièr e agost de 2020. 7 meses après lo diagnostic, un sus cada quatre confessava que l’afectavan encara de problèmas de santat restacats amb la covid-19. D’aqueles sonque lo 19% subiguèron una covid grèva e los calguèt espitalizar. L’edat mejana de totas aquelas personas èra de 47 ans.
Fins al 26% d’aqueles confirmèron qu’encara s’èran pas de tot en tot remeses uèch meses puèi. A mai, lo 55% de las meteissas personas reconeguèron de lassièra, lo 25% de problèmas respiratòris e lo 20% de depression. Segon lo sèxe, un 10% de mai de femnas, a respècte dels òmes, confirmèron qu’èran pas garidas. E fins al 40 % d’aqueles consultèron lo mètge per de problèmas restacats amb la pandemia almens un còp e de meses après èsser considerats pel sistèma de santat oficialament garits. Pr’amor de tot aquò, los autors de l’estudi demandan mai de susvelhança sanitària de la populacion e pendent mai de temps, e remembran que la covid pòt finir pas quand o ditz lo mètge mas encara longtemps après, aquò deu èsser tanben considerat pels sistèmas de santat europèus.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
