MOS A DEISHAT TÒNHO CASTET
Josèp Antòni Castet Varela mos deishec diuendres passat a 67 annadas. Era Val d’Aran, Occitània e eth mon der activisme perdec un gran amic e tanben un gran activista der aranés e dera lengua occitana. Entara còla de Sapiéncia ei un prètzhèt fòrça trist. Tònho, eth nòste amic Tònho, siguec eth revisor setmanèr de toti es articles publicats en aranés ena revista (mès de 250), pendent es darreres set annades.
Parlar de Tònho non ei malaisit. Ère ua grana persona plea de generositat. Eth trabalh non ère important entà Tònho se era tòca èra ajudar era lengua e cultura araneses e occitanes. Per açò calie tostemps trabalhar mès e mès, damb un gran esfòrç, coma demostrèc es darrères setmanes en tot revisar mès d’un article de Sapiéncia dera sèria Fauna Aranesa. Justament diuendres ath matin auiem arrecebut era darrèra revision, pòc abans dera sua mòrt. Èm desoladi.
Auem, amassa, damb toti es aranesi e occitans (e tanben catalans) perdut un gran amic e milhor persona. Eth sòn caractèr demostraue tostemps que calie esforçar-se tostemps pr’amor qu’era tòca ère tostemps trabalhar entà un objectiu superior, çò ei era defensa e difusion der aranés. Tostemps, era lengua e cultura araneses. E açò sonque se podie hèr damb paciència. Fòrça paciència.
Per açò Tònho trabalhec sense fin entara publicacion d’articles, era revirada de Tintin o des der Institut d’Estudis Aranesi, tostemps entara lengua, que viu aué ua situacion bric facila. Tònho, collaborador abituau de Sapiéncia e Jornalet, tanben publiquèc era revirada d’Alícia en País des Meravelhes e siguec tanben un paum des Paums, tostemps, enquiath darrèr moment.
Non ei comun parlar, sovent, d’amics que mos an deishat. Mès Tònho Castet, a mès d’activista entara lengua tanben siguec un bon amic. D’aqueri de non parlen guaire mès que demostren as auti tostemps com trabalhar ben entara lengua e cultura d’òc. E damb açò, eth sòn esperit, eth sòn esforç diadèr, era sua lucha entà ua melhor posicion der aranés en mon actual, Tònho mos balhèc a toti ua leçon que no pòt èster desbrembada. Pr’amor qu’ei atau, en tot trabalhar coma hormigues, que Tònho Castet, demostrèc a toti com hèr ben es causes, damb esfòrç, damb ua volontat que no pòt èster jamès trincada. Ei atau qu’eth legat de Tònho mos harà dificil desbrembar era sua persona. Ua bona persona e un gran amic. Descansa en patz amic Tònho. A lèu.
Era Redaccion
