L’elefant asiatic es un dels mamifèrs pus grands de la planeta. Lo cambiament environamental tanben es una perilhosa menaça per aqueste animal. Un nòu estudi realizat per una còla internacionala de scientifics confirmèt que l’espècia pòt arribar pèrdre fins un 42% de son abitat a Índia e Nepal.
La còla scientifica del MNCN-CSIC confirmèt que los cambiaments que patirà aquela espècia en Índia e Nepal fins l’an 2070 son grèus. E aquò aurà coma causa principala la pression umana e de mens en mens espaci environamental ont viure. Sonque qualqu’unas regions del nòrd e nòrd-èst d’aqueles païses seràn de bons abitats pels elefants asiatics. La rèsta del territòri ne patirà grèvas pèrtas.
L’estudi, que foguèt publicat al numeric Journal Diversity and Distributions, estudièt prigondament los efièches del cambiament climatic que patís uèi la planeta e cossí poiriá afectar aquela espècia mamifèra. E la resulta de l’estudi es brica bona.
Aital, de cambiaments de temperatura, mai e mai agricultura e fauta d’aiga seràn de factors que provocaràn una nòva distribucion dirècta dels elefants asiatics en Índia e Nepal pendent los proplèus 30 ans. E l’environament ont demoran uèi serà pas bon per aquela espècia pendent los proplèus ans.
Una màger pression umana
La còla de scientifics d’Alemanha, Itàlia, Birmania, Índia, Nepal e l’estat espanhòl confirmèt que la distribucion actuala d’aquela espècia a nivèl local seguís de pautas basadas en la temperatura e la pluèja. E uèi lo jorn solament demoran en 256 Km2 dins aqueles païses que, lèu, seràn, pus redusits.
Un dels scenaris estudiats (lo mens grèu) soslinhèt que en 2070 la pèrta d’environament serà mai moderada e doncas sonque del 20%. Mas d’autras linhas de recèrca confirmèron que poiriá èsser pus del doble.
“Ganharàn d’abitat mai al nòrd e al sud, sustot al long de las vals que i a entre las montanhas de l’Imalaia, çò diguèt Priya Davidar, cap de l’estudi. Mas los problèmas mai grèus arribaràn per de cambiaments en l’aiga e la temperatura e aquò serà la situacion pus grèva que patirà aquela bèla espècia los proplèus ans”.
La Redaccion
