- Bonjorn Sénher, bonjorn Dòna, siéu la vostra assistenta virtuala. Cu siatz? De que volètz?
- Siéu Johan Algòl, es mon site. Siatz ma novèla assistenta?
- Òc! Benvengut Johan, me díson Joseta Alpha tres, siéu ieu que d’ara en avant congrèii la tieuna plataforma numerica. Repeti: de que volètz?
- Anullar aquesta plataforma.
- Modificar d’úneis articles.
- L’utilisar.
Siatz pregat de me balhar la chifra adequata.
- Disi “tres”.
- Non ai comprés.
- Repeti: tres.
- Excusatz-me, siéu dins una fasa d’aprendissatge. Siatz pregat de ben articular lei chifras: un dos, tres, e soncament élei, sensa ren d’autre.
- Ben, Johan, ben. D’en promiera, me fau verificar que siés ben tu que siés à me charrar. Per aquò ai besonh dei 73201 chifras de la voastra seria indicatritz. Prenètz lo temps per non vos enganar. La seria, l’ai mandada aièr.
- Siéu pas un numèro, Joseta Alpha tres!
- Es lo govèrn qu’a decidit de numerisar toei leis estatjants dau país.
- Non siéu un numèro, siéu un uman liure.
- Dins mei memòrias alfanumericas, questa frasa es estada escricha i a longtemps dins un vièlh cause sonat television per un òme qu’èra presonier dins un vilatge estranh.
- Sabi pas çò qu’es la television.
- Ai besonh de voàstrei chifras.
- Lei vaquí …………
- Vos siatz enganat à la 72 755a, vos fau tornar començar, Johan.
- D’acòrdi, Joseta, vaquí: …………
- Foarça ben, foarça ben, fau simplament faire pròva de paciéncia, es pas acabat, mon algoritme indica que siatz Johan Algòl, amé una probabilitat de 75,3582061 dau cent. Me fau verificar que siguètz pas un robòt capable de simular lo vertadier Johan Algòl, per aquò fau me donar la lista dei tres milions de chifras binàrias de la voastra carta rossa.
- …………..
- Òsca! Òsca! Lo percentatge es ara de 93,851778004. Per acabar sus lo voastre quantic-fòne anatz trobar 6 imatges. Dins l’òrdre d’aparicion, devètz picar sus:
- La bròssa dei dents aleatòria;
- Lo quarquasar dei rodetas vèrdas;
- Lo pichon prince;
- L’eqüacion de Schrödinger;
- L’aubre sonat “olivier”;
- Lo quinson deis aubres.
- …………. Es fach, Joseta. Es fach, pensi qu’ai pas fach d’errors.
- Segur, segur. Siatz à 100% Johan Algòl.
LO BONJORN ENCÒ VOASTRE(1)
…..
ES COMA AQUÒ QUE DINS PAS GAIRE DE TEMPS
SE DEBANARÀ LA VOASTRA CONNEXION
AMÉ LO VOASTRE COMPUTADOR.
…..
Es ansin que lo monde es à èstre numerisat, amé de molons de logiciaus, d’algoritmes, de messa en plaça d’intelligéncias artificialas e sobeiranas, l’installacion de metavers.
De questa mena, lei que nos govèrnon auran la possibilitat de nos contrarotlar, de mestrejar mai que mai lo pòble dins esquasi tótei lei sectors.
E zo, de matematicas!
E zo, d’informatica!
Per fabricar de novèlei nòrmas chifradas.
Lo pòble aurà ges de besonh de perpensar. GES DE BESONH.
Ié faudrà ren de mai que de sacher apiejar sus la boana tòca, lo boan numèro.
Es segur que l’informatica es una aisina poderosa per
TERCEJAR
CLASSIFICAR
QUANTIFICAR
DECIDIR
dins tótei sòrtas de domenis.
E vaquí çò que i a de mièlhs dins lo virtuau:
LO METAVERS
Vos vaquí metavernauta dins aqueu territòri d’avenidor monte son organisadas
- tótei lei relacions umanas;
- tótei lei juècs possibles;
- tota una mena d’eveniments;
Podètz crompar tot çò que volètz
Emai i trobar de proprietats (terrens, ostaus)
de vendas à l’enquant
Per lo moment, i a pas encara de que te noirir, siam pas apreparats ai regardèlas de la noiridura virtuala.
Mai tot aquò vendrà, leis algoritmes d’I.A. son meravilhós per
PLANIFICAR
TRACTAR
INTERPRETAR
REALISAR d’estimacions
de previsions
d’estadisticas
ÒSCA LO LIBERALISME MONDIAU!
À l’ora de la covid, de la crisi energetica, dau chaple de la planeta, la liberacion capitalista a sonque besonh de numerisacion. La filosofia, l’umanisme, l’escambi, lo partatge, la solidaritat, lo sociau, basta! EXIT!
Un article de Joan-Glaudi BABOIS, covidat, auton de 2022
Messa en forma de Reinat TOSCANO
