La majoritat de nosautres pensam que, per visitar la natura e veire de luòcs estonants cal se n’anar luenh, plan luenh, d’ont demoram. Totun, aqueste es pas totjorn lo cas e l’estat de Nòva-York ne seriá la pròva, car cal pas viatjar plan per visitar una meravelha naturala coma lo pargue estatal de Watkins Glen, a Nòva-York, e qu’es pas luenh de la vila de Nòva-York.
Aital, lo pargue conegut amb lo nom de Watkins Glen, situat plan près del vilatge de Watkins Glen, a l’estat de Nòva-York, demòstra la volontat politica de suenhar l’environament de l’administracion estatala de Nòva-York, malgrat qu’a pichona escala. Lo pargue foguèt comprat per l’estat de Nòva York en l’an 1906 e aquò arribèt aprés mai de 40 ans d’administracion privada de l’endrech, car lo pargue ja existissiá coma pargue privat dempuèi l’an 1863! Uèi lo pargue Watkins, un joièl de la natura pr’amor de las sieunas cascadas d’aiga naturalas, es dirigit per per la region de Finger Lakes e forma part dels pargues estatals de l’estat de Nòva-York.
Un pargue pichonèl
Malgrat que quand òm pensa en de pargues naturals òm los restaca amb de milièrs e milièrs d’ectaras de natura, lo pargue estatal de Watkins Glen es sonque un pichonèl pargue regional, mas tanben plan bèl. Per ansin, la part inferiora del pargue es plan pròcha al vilatge de Watkins Glen e la part superiora includís un bòsc dubèrt e un airal total de 1000 ectaras.
Lo luòc mai visitat del pargue, totun, e atanben la part pus bèla, es una estrecha gorja d’aperaquí 120 mètres de nautor talhada a la ròca pr’amor d’un corrent d’aiga qu’aviá coma origina los glacièrs mai nauts de l’epòca glaciara. Aquela aiga encara arriba uèi fins a la val dels Seneca (nom d’un flume mas tanben d’una tribú d’indigènas americans).
Lo temps creèt de cascadas ont abans i aviá de ròca pr’amor que la majoritat de ròcas de l’airal son sedimentàrias, de l’edat devonica. La formacion de ròca que i a a la region son de lutitas e de pèira calcària a mai de pèira de sabla. Per arribar al pargue òm i pòt dintrar per tres dintradas dubèrtas dempuèi lo mes de mai fins a novembre. Totes los camins que i a dins lo pargue son restacats e es plan malaisit de s’i perdre.
Pasmens, al pargue de Watkins Glen i a 19 cascadas d’aiga que pòdon èsser observadas dempuèi divèrses pònts de pèira qu’òm bastiguèt al long del sègle XX. Se òm seguís la Dralha del Sud o la Dralha Indiana (Indian trails) òm pòt tanben espepissar un bòsc meravelhós. Un dels autres camins plan celèbres del pargue es lo Camin george situat al costat de las cascadas e qu’a fins a 800 escalons.
Dins del pargue de Watkins Glen i a de luòcs ont acampar amb tota sòrta de botigas e servicis pels visitaires. Lo pargue es dubèrt al long de tot l’an mas benlèu la melhor epòca per aquò far es la prima o l’automne, pr’amor del clima plan fred de la region en aquel luòc d’America del Nòrd.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
