Segon la NASA, una pluèja d’asteroïdes arribarà sus la Tèrra los meses de setembre e octòbre venents. E mai sián pas en majoritat perilhoses, l’organisme scientific estatsunidenc avisèt que l’impacte d’un d’aqueles asteroïdes, una ròca de mai de dos mètres de diamètre sul Pacific, poiriá èsser un pauc dangierós. Lo començament de la pluèja d’asteroïdes aurà luòc lo 1r de setembre, amb la casuda de l’asteroïde 2001 ES4.
La NASA confirmèt qu’aqueste asteroïde poiriá rasejar nòstra planeta al 30% de la distància que i a entre la Luna e la Tèrra, mas que tanben poiriá passar mai luènh que l’orbita lunara. Aquel asteroïde a un diamètre de fins a 49 mètres (coma lo que casèt sus Chelyabinsk en 2014 e que fasiá aperaquí 17 mètres de diamètre). Mas segon los astronòms estatsunidencs, 2001 ES4 seriá pas brica dangierós pr’amor que passariá luènh de la Tèrra e que, e mai se tombava sus la Tèrra, lo damatge local seriá pas grand.
D’autres asteroïdes
L’8 de setembre arribarà tanben sus la Tèrra l’asteroïde Apollo 2020 PT4. Quatre jorns puèi, arribarà 2012 RM15 e l’endeman 2017 EUA, classificat dins la categoria Aton. L’endeman, vendrà 2020 QL2 e, tres jorns puèi, 2014 QJ33. La pluèja d’asteroïdes del mes de setembre de 2021 se finirà amb la venguda de 2017 SL18. Pasmens, pendent lo mes d’octòbre encara passaràn prèp de la Planeta Blava dètz asteroïdes de mai, mas seràn pas tan grands coma los que seràn arribats pendent lo mes de setembre. Lo 17 d’octòbre arribarà l’asteroïde 2014 QJ33, e lo 20 l’asteroïde nomenat 2017 SL16.
De remembrar que lo mes d’agost passat, justament lo 15, arribèt una ròca sus la planeta qu’aviá las dimensions d’un camion pichonèl. Foguèt identificada puèi amb lo nom de 2020 QG e establiguèt un nòu recòrd: es l’objècte espacial que rasegèt la Tèrra al mai prèp fins a uèi lo jorn, car volèt a sonque 2 950 quilomètres d’altitud subre l’ocean Indian, a mai de 12,3 quilomètres/segonda. Segon plusors cercaires i a de centenats de milions de pichons asteroïdes coma aquel qu’aténhon cada an la Tèrra mas que pòdon pas èsser identificats pr’amor que son tròp pichons.
Totun, lo màger dangièr segon los astronòms serà lo 2 de novembre de 2021 quand vendrà prèp de nòstra planeta l’asteroïde 2018 VP1. Aqueste asteroïde foguèt descobèrt en 2018 quand encara èra a mai de 45 000 quilomètres de la Tèrra e i a una probabilitat sus 240 (çò es un 0,4%) de trucar amb la superfícia de la Planeta Blava. Pasmens, mesura aperaquí 2 mètres de diamètre e, se truquèsse contra la superfícia terrèstra, o fariá coma o faguèt l’asteroïde de Chelyabinsk en 2013 e tombariá dins l’ocean Pacific.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
