Un nòu estudi fach per l’Universitat de Columbia analizèt las causas que pòdon provocar de cabèls grises als umans. E malgrat que fins ara òm aviá dich que sonque podián venir grises se los cabèls naissián aital, l’estrès foguèt soslinhat coma una de las causas per provocar aquela color en de cabèls d’autra color. A mai, los cercaires descobriguèron que, sens d’estrès, la color originala pòt tornar.
Aqueste seriá doncas lo primièr estudi scientific que confirma la causa-efièch entre l’estrès psicologic dels umans amb la color grisa dels cabèls. Totun, la suspresa arribèt en tot descobrir que, quand i a pus d’estrès, la color originala del cabèl pot tornar al sieu estat coma abans. Per ansin, demostrèron que la color grisa dels cabèls umans es pas, coma pensavan totes, permanenta.
L’estudi foguèt publicat al numeric eLife e demòstra que i a una relacion entre l’estrès uman e la color grisa del cabèl. Segon Martin Picard, lo scientific que dirigiguèt aquel estudi, “comprene melhor que la color grisa del cabèl pòt tornar a la sieuna color originala poiriá ajudar a arrestar cossí venim mai vielhs, car es sonque un efièch de l’estrès. Venir mai vielh es un efièch biologic que pòt èsser temporal ”.
Un efièch pas permanent
Segon l’estudi lo cabèl es restacat amb d’ormonas de l’estrès e quand aqueste es naut pòdon venir grises. Per far l’estudi los cercaires analizèron lo cabèl de 14 peronas e demandèron quin èra lor nivèl d’estrès pendent la vida vidanta. L’estonament scientific arribèt quand foguèt descobèrt que lo cabèl pòt tornar al sieu estat e color original quand i a pas pus d’estrès.
“I aguèt cèrts cases que cambiavan la color tornarmai quand la persona èra en vacanças, çò diguèt Picard. Foguèt alara quand avèm començat a estudiar lo cambiament del nivèl de proteïnas, que podiá entraïnar aquel cambiament de la color del cabèl. Los umans patisson mai de 300 cambiaments del nivèl de proteïnas e una causa cèrta es l’estrès”.
Totun, redusir lo nivèl d’estrès entraïna pas, al 100%, un retorn a la color originala del cabèl. Aquò depend de la persona. Quand sèm mai e mai vielhs la color grisa arriba pr’amor d’un màger estrès. E es pus malaisit de tornar a la color originala. Car una persona amb 70 ans d’edat e qu’a lo cabèl gris dempuèi fa 10 annadas o mai es plan malaisit que pòsca tornar a aver la color del cabèl originala.
La Redaccion
