Se sabiá que las vops èran d’animals plan intelligents; que podián caçar tota sòrta de pichons e mejans mamifèrs dins los bòsques. Pasmens, ara es confirmada una nòva estrategia de caça que permet afirmar que los rainals son de predators que tanben pescan. Lo fach es nòu per la sciéncia, e los cercaires qu’o an pogut espepissar se son mostrats totalament estonats. Ça que la, poiriá èsser una estrategia desvolopada dempuèi de milièrs d’ans.
La descobèrta arribèt en març de 2016 après constatar cossí un rainal ros se ronçava lèu-lèu sus un estanh pròche e pescava una carpa plan gròssa. L’accion poguèt èsser enregistrada en vidèo per dos cercaires que i aviá près de la scèna. Aquò confirmèt pel primièr còp qu’aquela espècia canida (Vulpes vulpes) tanben pesca. Lo fach se repetiguèt fins a 10 còps e la vop que pescava capturèt fins a 10 carpas durant sonque qualques oras. La descobèrta foguèt publicada lèu dins lo numeric Ecology e fa de la vop rossa lo segond canid pescaire de la planeta.
Un fenomèn estonant
“Foguèt plan estonant, çò diguèt un dels cercaires qu’observèron aquel fenomèn, Jorge Tobajas, de l’Universitat de Còrdoa. Avèm estudiat aquela espècia pendent mai de quatre annadas, mas descobrir aquò foguèt un eveniment inesperat.” E mai lo fach aguèt luòc justament quand Tobajas e un autre cercaire, Francisco Díaz-Ruiz, de l’Universitat de Malaga, èran ailà, mas per autre projècte. La vop observèt los cercaires e fugiguèt pas, çò que cridèt l’atencion dels cercaires. E decidiguèron d’enregistrar çò qu’anava far lo rainal.
“Après veire cossí pescava aquela vop, çò apondèron los cercaires, çò qu’avèm pensat es qu’èra pas lo primièr còp, pr’amor de la tecnica utilizada. E mai encara quand lo rainal manjèt pas tot lo peis. L’emportèt fins a un amagatal per lo manjar après. E mai d’un peis foguèron portats a sa companha, una vop femèla”. De remembrar que foguèron trapadas mai d’una rèsta de peisses dins d’amagatals de rainals abans, mas los cercaires èran pas segurs de lor origina, pr’amor que podiá ben èsser solament de carronhas.
Segon plusors cercaires, lo vidèo demòstra que la vop es desenant lo segond canid que pòt pescar. Fins a uèi, la sciéncia aviá sonque confirmat que pescavan los lops de la còsta americana del nòrd del Pacific e tanben de Minnesòta. Mas ara los cercaires creson que benlèu aquela conducha es mai generala demest los canids. E Tobajas confirmèt que la vop es doncas un dels predators mai intelligents de la planeta.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
