Plusors espècias animalas s’adaptan uèi lèu al cambiament climatic. Podèm dire çò de meteis de las plantas ? Un nòu estudi confirmèt que tanben elas utilizan la sieuna memòria epigenetica per s’adaptar als prigonds e grèus cambiaments environamentals que patís uèi lo jorn la planeta. E, a mai d’aquò, balhan dinformacion creada a las nòvas generacions.
Aital o confirma un nòu estudi publicat al numeric Trends in Plant Science; las plantas tanben s’adaptan lèu lèu als efieches produsits pel cambiament climatic actual. E balhan d’informacion genetica a las nòvas e futuras generacions per poder subreviure melhor a aqueles cambiaments.
Lo mond vegetal patís uèi un dels piègers estrancis environamentals de la planeta blava. Los ivèrns son mai cuèrts en cèrts luòcs e las plantas, pasmens, balhan una responsa biologica, car produïsson de flors tanben abans. Mas las plantas an pas de rets neuronals e la sieuna memòria es al 100% moleculara e bioquimica. Es la celèbra memòria somatica. Son de mecanismes qu’ajudan la planta a reconéisser de cambiaments en de condicions environamentalas e poder reagir puèi.
D’informacion epigenetica nòva
Aquela informacion produsida per la memòria vegetala somatica pòt èsser balhada als descendents de la planta a travèrs del camin epigenetic. “Pòdon balhar d’informacion sus lo nivèl de sal, de secada, de freg, d’atacas patogènas e encara de metals pesants al sòl, çò confirmèron los cercaires. Avèm podut demostrar qu’aquela informacion tanben es enviada de biais epigenetic als descendents de la planta”.
Ara los cercaires que realizèron l’estudi vòlon assajar de comprene cossí se produsís aquel enviament epigenetic d’informacion divèrs entre las plantas. Segon los scientifics, çò que cal far ara es decodificar l’alfabèt epigenetic vegetal per veire cossí arriba lo cambiament climatic sens de cambiaments a l’ADN”. Cossí que siá, la sciència descorbiguèt que las plantas tanben pòdon s’adaptar e lèu a aqueste tipe de cambiaments environamentals.
La Redaccion
