La santat mondiala poiriá patir lèu una grèva crisi. Aquò es çò que l’Organizacion Mondiala de la Santat (OMS) n’avisèt fa qualques jorns: se i a pas una utilizacion condrecha dels antibiotics, la resisténcia biologica umana a aquestes poiriá causar lèu de milions de mòrts e, a l’encòp, una grèva crisi mondiala coma la que se passèt en 2008.
Per ansin, l’OMS demandèt una legislacion unica dels antibiotics sus la planeta e una melhora utilizacion d’aquestes. Se aquò se fa pas, segon aquel organisme de las Nacions Unidas, abans l’an 2050, la resisténcia umana als antibiotics creisserà fòrça e i aurà una grèva pandemia que poiriá aténher los 10 milions de mòrts. E aquò es a mand d’arribar pr’amor que la tolerància als antibiotics es ja la causa actuala de pus de 700 000 decèsses per an.
Tot aquò se passèt dins lo darrièr rapòrt sus la santat que las Nacions Unidas publiquèt ongan. Après far una analisi prigonda de la santat umana, l’OMS determinèt que lo problèma pus grèu dels umans durant los ans venents seriá la resisténcia als antibiotics. E aquò a coma causa dirècta la marrida utilizacion dels antibiotics de part dels govèrns de la planeta.
La crisi de la santat que pòt arribar lèu, segon l’OMS, aurà coma causa lo fach que, uèi, de mai en mai d’umans son resistents als antibiotics. E s’aquela crisi se produguèsse, fin finala, çò ditz aquel rapòrt, i auriá d’umans que moririán aisidament per de malautiás que uèi son pas grèvas e que son fòrça comunas. Entre aquestas, d’infeccions urinàrias, respiratòrias o encara las sexualament transmissiblas.
Una grèva menaça mondiala
D’autre caire, l’OMS tanben avertiguèt que los efièches economics d’aquela crisi sus la planeta serián tanben tras que grèus. Segon aquela organizacion, aquò poiriá venir una granda catastròfa economica per la Tèrra. D’efièch, mai de resisténcia umana als antibiotics entraïnariá mai de recèrca medicala e, fin finala, aquò seriá un problèma per la produccion mondiala d’aliments. Segon la Banca Mondiala, en mai d’aquò, la tolerància als antibiotics menariá (o fa ja, en realitat) a una grèva crisi de pauretat per mai de 25 milions d’umans que se poiriá agravar pendent los dètz ans que venon.
Per far aquel rapòrt, las Nacions Unidas poguèron trabalhar amb divèrsas agéncias de santat internacionala, e la conclusion es, segon l’OMS, que cal far un estudi “pus prigond de mai d’una accion immediata, coordenada e sens limits dins totes los païses de la planeta sus aquesta problematica”.
Segon la sossecretaria generala de l’ÒNU, Amina Mohammed, “o cal far per poder balhar de proteccion a mai d’un sègle de conquistas medicalas”. Dins aquel sens, l’ÒNU demandèt de poder priorizar la creacion de plans d’accion estatals e de programas mondials sus la resisténcia als antibiotics en d’umans mas tanben en de plantas e d’animals. Per qu’aquò siá possible, cal far mai de recèrca e desvolopar de nòvas tecnologias per la lucha contra aquela resisténcia e metre fin a l’utilizacion d’antimicrobians dins las culhidas agricòlas.
Segon l’ÒNU, la situacion actuala arriba pas pus a la tòca de santat que l’ÒNU se dona per l’an 2030 per tal de far de la planeta un luòc mai segur. L’ora es doncas venguda critica.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
