La pantèra nebulosa (Neofelis nebulosa) es un felin trAs que rar. En China es coneguda tanben coma leopard de la menta pr’amor que las sieunas plapas son semblantas a de fuèlhas d’aquela planta. Lo leopard de la menta es una de las doas soletas espècias apertenentas del genre Neofelis e apertenenta a la familha dels Felidae.
Los mascles son màgers que las femèlas e pòdon arribar a pesar mai de 65 Kg. La femèla, pasmens a un pès mejan de 20 Kg e la longor del cors d’ambedós sèxes se situa entre 60 e 110 cm.
Lo pelatge es plen de tacas de color bruna mai escura, gaireben negra. La coa es plan longa e es usada per aver mai d’equilibri quora son sus los arbres, car an de costumas plan arboricòlas. Pòt montar plan pertot e sus los arbres pòt córrer tanben plan, sens èsser brica descobèrta. D’efièch las sieunas colors l’ajudan plan a l’ora de caçar de primats, la sieuna noiridura pus aimada.
Plan adaptada als arbres
La pantèra nebulosa es doncas plan adaptada a viure sus los arbes. La sieuna principala noiridura son de primats, de monards, e de macacos. Totun, tanben se noirís sovent d’aucèls, pichons mamifèrs o encara qualcun cèrvi pichonèl.
Lo leopard de la menta es malaisidament espepissat per d’umans. Sonque s’apròcha – mas pas gaire – a d’airals abitats per d’umans quan a de besonh una prèda aisida. Es alara quand rauba de pòls o de galinas.
Los canins de la pantèra nebulosa son plan longs. Plan mai que çò qu’òm esperariá d’un felin amb aquelas mesuras. E tanben per rapòrt als d’autres felins de la planeta. Lo cran es plan diferent tanben, e pr’amor d’aquò es estada classificada amb un genre unic: neofelis.
Es un felin qu’a l’abilitat de sautar de branca en branca e que pòt baissar dels arbres amb lo cap endavant. Pr’amor d’aquò es considerat coma un dels felins mai agils del mond e sonque pòt èsser restacat amb lo cat tigre american.
Pas sovent, caça d’animals terrèstres e quora aquò es fach son caçats totjorn dempuèi los arbres, en tot sautar sus las predas. Es un caçaire amb d’abitudas nuechencas e pr’amor d’aquò es plan malaisit l’estudiar. Uèi lo jorn encara òm coneis pas gaire las sieunas abitudas a l’ora de caçar o d’autras donadas etologicas d’aquesta espècia.
Sonque fins fa pas gaire òm pensava qu’èra una sosespècia d’N. nebulosa, mas divèrses estudis de l’ADN confirmèron que la pantèra nebulosa que demòra en Sumatra e Bornèo es una autra espècia desparièra.
L’abitat natural de la pantèra nebulosa son de forèsts tropicalas de l’èst d’Índia, sud chinés, Birmania, Indochina, Sumatra e Bornèo. E son plan espandits per de paluns, de prats d’èrba o de manglars de còsta a mai de montanhas mai nautas de 2.000 mètres.
Aprés la copula, lo prenh de la femèla demòra entre 85 e 93 jorns. Aprés pòdon nàisser fins a 5 catons cècs. 10 jorns aprés los catons comènçan a dubrir los uèlhs e 5 setmanas puèi ja pòdon anar amb ela a caçar. Pasmens, viuràn aital pendent 10 meses e puèi seràn considerats coma independents per la maire.
Una vida pas gaire longa
En captivitat, la pantèra nebulosa pòt viure fins a 17 ans. Totun, òm coneis pas quants ans pòt viure en libertat. Mas òm sospècha que pas gaire annadas. Uèi i a mai d’un projècte per assajar d’elevar de pantèras nebulosas mas capitèron pas, benlèu pr’amor de la tras que nauta agressivitat dels mascles qu’aucisson las femèlas quand i a un autre mascle prèp.
Es pas conegut lo nombre de pantèras nebulosas que i a uèi lo jorn a la planeta. Òm cre que lor nombre es brica naut, pr’amor de la desforestacion actuala que patisson aquelas regions e tanben pr’amor del braconatge, car segon la medecina tradicionala chinesa, divèrsas parts del sieu cors an de bonas proprietats per la santat umana. E, tanben pr’açò es estada classificada coma espècia en situacion tras que delicada.
E, malgrat que la caça d’aquestes felins es plan enebida en totes los estats asiatics ont demòra, òm considèra qu’es un felin en grèu dangièr d’extincion. Pr’amor d’aquò òm pòt pas vendre o comprar cap part de l’animal e sonque pòt èsser capturada per de cercaires per l’estudiar e se òm provòca jamai cap mal a l’animal.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
