De còps nos demandam quora arribarà lo futur. Lo futur qu’avèm totes e totas imaginat a travèrs de libres o filmes. E vesèm pas que lo futur ja es aicí. Ja es arribat. En Japon, una entrepresa vòl bastir una vila plena de robòts abans 2020. L’experimentacion serà utila per conéisser cossí interagisson los èssers umans e los robòts e melhorar aquesta relacion.
L’entrepresa se sona Cyberdyne e es la meteissa qu’a bastit l’exoesqueleta HAL ( Hybrid Assistive Lim), amb l’Universitat de Tsukuba, concebuda amb la tòca d’ajudar en çò de possible los malauts o andicapats. Ara vòl bastir una vertadièra vila robotica qu’aurà de centenats de robòts qu’auràn d’ajudar los umans dins de prètzfaches coma la medecina, l’indústria o l’agricultura.
Yoshiyuki Saukai n’es lo cap del projècte e tanben fondador e president de Cyberdyne. A nomenat la futura vila amb lo nom de Cybernic City, qu’aurà mai de 84.000 mètres cairats d’extension e serà situada prèp de la vila japonesa de Tsukuba – al nòrd de Tòquio -. Los terrens ont serà bastida aquesta vila robotica son estats crompats per 54 milions de dolars. Lo projècte inclutz divèrses edificis geriatrics, un centre comercial, un pargue e de centenats de robòts qu’auràn d’ajudar los umans en la lor vida vidanta dins aqueste complèxe futurista.
Los ostals an pas encaran de prètz
E mai ja i aja fòrça personas interessadas per demorar dins aquesta vila robotica, lo projècte envisatja pas encara quin serà lo prètz mejan d’un ostal. Malgrat la demanda, l’entrepresa que bastirà aquesta vila, Cyberdyne, preferís esperar. Totun, divèrses expèrts en robotica ja an confirmat que lo bastiment de la Vila Robotica poiriá èsser una bona experimentacion sus l’interaccion entre umans e robòts e sus cossí se pòt melhorar la convivéncia entre los unes e los autres.
Cyberdyne tanben a l’intencion de fomentar la cooperacion entre entrepresas e d’accelerar aital lo desvolopament e l’introduccion dels robòts en la nòstra societat. Las previsions son d’aver de resultats ja visibles abans los Jòcs Olimpics de Tòquio en 2020. Coma o disiam, lo futur ja es arribat.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
