JA ES ARRIBADA LA VEITURA AUTONÒMA
Fin finala, e aprés gaireben tres ans de pròvas puèi, l’Administracion Nacionala de Seguretat del Trafic en Rota dels Estats Units (NHTSA) acceptèt balhar lutz verda a la produccion e usatge de veituras autonòmas als Estats Units. E se aquò se debana ailà vòl dire que lèu arribaràn tanben aquelas decisions administrativas e aquel tipe de veïculs autònoms nòus tanben a Euròpa.
Per ansin, çò que fins ara èra lo proplèu futur de la veitura autonòma als Estats Units e a la planeta es ja una realitat al present. E aquò pr’amor que l’administracion federala estatsunitenca acceptèt, fin finala, d’autorizar la produccion e usatge d’aquel tipe de veïculs aprés o rebutar fins ara.
La decision se basa sus un document de 155 paginas qu’autoriza las entrepresas per bastir de veituras autonòmas amb de sistèmas automatics de conduccion. L’administracion d’aquel país, totun, avertiguèt que lo nòu dessenh d’aqueles veïculs aurà d’aver lo quite nivèl de seguretat que las veituras que son pas autonòmas.
De veituras nòvas
Segon Pete Buttigieg, secretari del transport en aquel país, “la tòca es desvolopar de sistèmas de seguretat bons pels veïculs autònoms. Amb aquesta decision çò qu’avèm fach es definir los estandards de seguretat de besonh amb de veituras qu’an tanben ADS”.
A mai d’aquò, Steven Cliff, de la NHTSA confirmèt que cal aver una seguretat parièra en aquel tipe de veituras malgrat que lo conductor serà pas pus una persona. Mas la seguretat déu èsser totala dempuèi lo començament, çò diguèt.
Tot aquò arriba aprés se conéisser que fa pas gaire tanben los camions autònoms foguèron autoritzats, aumens en cèrtas parts del país. De rebrembar que plusors entrepresas coma Waymo (Google), Ford, Tesla o Aurora Innovation, a mai de General Motors, fa d’annadas que vòlon lançar de veituras autonòmas al mercat mas fins ara podián pas o far. E General Motors, a mai, demanèt poder produire e usar una veitura autonòma (robotaxi) nomentat Cruise Origin, que ara poiriá ja sortir al mercat en 2023.
D’un autre costat, divèrsas entrepresas estatsunitencas coma GM, Cruise o Waymo ja avián autorizacion abans per circular amb de veituras autonòmas per demostrar qu’aquel tipe de veïculs èra segur. De totas aquelas entrepresas la pus avançada, per rapòrt a las autras, poiriá èsser Waymo (de Google), pr’amor que ja fa mai de doas annadas que fa de pròvas amb de veituras autonòmas a l’estat d’Arizòna. Tanben aquesta entrepresa a lo recòrd nacional de 2021 pr’amor que faguèt mai de 3,6 milions de quilomètres amb de veituras autonòmas sens cap accident. En 2020 ja n’aviá fach tanben mai d’un milion de quilomètres amb aquel tipe de veïculs.
De soslinhar qu’en cèrts estats del país, coma Califòrnia (mai que mai al nòrd de l’estat) los abitants locals ja se son familiarizats amb las veituras autonòmas dempuèi fa dos o tres ans. Benlèu pr’açò l’administracion estatsunitenca acceptèt de las daissar circular pertot. E pr’amor d’açò la veitura autonòma ja es arribada.
La Redaccion
