AN CREAT LO ROBÒT LO PUS PICHON DEL MOND
An creat lo robòt mai pichon del Mond una còla de scientifics de l’Universitat del Nòrd-Oèst, d’Illinois (Estats Units). Lo robòt mesura aperaquí sonque 0,5 mm de longor e pòt èsser contrarotlat per d’umans. Lo robòt pòt aital sautar, caminar e virar segon çò que li es demandat.
“La robotica es encara uèi un ponch de recerca estonant, çò diguèt John Rogers, d’aquela universitat estatunidenca, e dirigent de la còla de cercaires qu’an creat la maquina. Desvolopar de robòts plan pichons es tanben una causa amusanta pels cercaires”.
Segon aqueles cercaires, aquel tipe de robòt s’es creat per tal de poder reparar d’estructuras complèxas o encara de far l’assistent medical per operar d’artèrias, arrestar la sang d’una nafradura o destruire cèrts tumors. E tot aquò amb un sistèma pas brica invasiu”.
De movements contrarotlats
Segon la còla de scientifics qu’an elaborat lo robòt, la tecnologia utilizada permet de contrarotlar de tot en tot sos movements, e aital pòt córrer mai o mens cada segonda segon çò que li demanda l’uman. E aquò seriá tanplan un prètzfach revolucionari dins lo mond de la robotica actuala.
Lo nuclèu d’energia emplegat per aquel robòt es pas informatic, idraulic o encara electric. Es la capacitat pròpria d’aquela maquina de se remembrar çò que faguèt que produtz l’energia per que se mòga. A una memòria que, quand s’escalfa perque sap pas qué far, li remembra çò fach fins alara, e aquò li balha de nòva energia pel movement.
Al començament, los scientifics utilizèron un lasèr per calfar lo robòt. Lo material del robòt ven mai caud e aqueste pòt començar de se mòure abans de se refregir. Es pendent la transicion que la subís lo robòt en passant d’una fasa a una autra que se produtz lo movement del robòt.
Per ansin, lo robòt pòt sonque començar de bolegar se recep lo senhal a travèrs del lasèr. Lo meteis lasèr balha tanben al robòt lo camin e la direccion per se mòure. Se lo lasèr bolega de drecha a esquèrra, per exemple, lo robòt, puèi, se mourà de drecha a esquerra. Segon Rogers, reduire las dimensions del robòt a plan ajudat a una mai fòrta velocitat.
La tecnologia emplegada pels cercaires per bastir lo robòt se basèt en una utilizada pels pròpris scientifics fa 8 ans que seguissiá los libres per mainatges que se pòdon dobrir e dins los quals i a de relèus en tres dimensions. Primièr, caliá bastir lo robòt sul plan e es quand lo material ven mai aisit que lo robòt es creat en tres dimensions per el meteis.
Amb aquel metòde los cercaires poiràn crear de robòts amb d’autras talhas. “Es un procès plan creatiu que provòca totjorn l’estonament dels autres scientifics e especialistas. La nòva de la creacion del robòt pus pichon del Mond foguèt publicada dins lo numeric Science robotics.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
