ETH VIATGE A MART
Aué tots parlam d’un possible viatge a Mart, que poirie passar lèu, mès auèm pensat jamès quan temps poirie demorar ? E se ei fòrça long, poirie èster un perilh entara salut des astronautes ? Pr’amor que, segontes diuèrses agències espaciaus, era arribada der òme a Mart arribarà en 2030 o dilhèu abans, en 2024 !
«2024 ei era data mès optimista causida per Elon Musk entà enviar un coèt a Mart. Totun, e maugrat er espèr d’aguest òme, dilhèu serie mès reau era arribada dera umanitat a Mart en 2030. Adara, sabèm quan temps pòt demorar un coèt terrèstre enquiara sua arribada a Mart ?
Eth viatge que poirie arribar a Mart en 2030 ei preparat pera NASA americana. Tanben i a fòrça auti païsi que vòlen enviar un coèt a Mart damb astronautes : China, Russia, Emirats Aràbis e tanben era Union Europèa. Açò se ua entrepresa privada coma SpaceX, d’Elon Musk, non i arribe abans. Pr’amor qu’ara ditz que i poirien enviar un coèt en 2024.
Un objectiu fòrça luenhan
Er objectiu non ei aute que bastir ua vila damb mès d’un milion d’abitants en Mart abans dera fin deth sègle XXIau. Mès açò ei reau ? Pòt èster possible ? Mart ei era dusau planeta mès prèpa ara Tèrra dempús Venus. Maugrat açò ei situada a mès de 220 milions de quilomètres deth Solei.
La Tèrra ei a 150 milions de quilomètres deth Solei. E, donques, ei luenhana Mart dera Tèrra ? Ei a apuprètz 70 milions de quilomètres e pro ? Era realitat non ei tan simpla, pr’amor qu’ambedues planetes son en movement en espaci ath torn deth Solei.
En moment mès prèp, Mart ei a sonque 54,6 milions de quilomètres dera planeta blua. Pr’açò cau auer ua des dues planetes situada ena afelia deth Solei (era Tèrra) e era auta ena perièlia deth Solei (Mart). Mès acò ei un fenomèn fòrça estranh en espaci. En 2003 gaireben i auec aguesta situacion d’ambedues planetes. Mart ère a sonque 55,7 milions de quilomètres dera Tèrra. Totun, aguesta siguec era distància mès cuèrta que i auec entre era Tèrra e era Luna en 60.000 annades !
Açò dit, cau compréner qu’es dues planetes an un movement e velocitat diferentes. Se era velocitat siguèsse era madeisha, ua nau espaciau coma New Horizons i poirie arribar en sonque 38 dies ! Mès era Tèrra demòre apuprètz ua annada entà virar ath torn deth Solei e Mart 1,9 annades.
Enviar ua nau espaciau damb umans a Mart ei com lençar ua pèira a un objectiu en movement. E açò ei fòrça, fòrça dificil. Cau conéisher era distància entre ambedues planetes mès tanben saber on ei era auta planeta tostemps. Eth milhor moment ei cada 26 mesi e açò ei un prètzhèt qu’es agéncies espaciaus saben ben.
Cau rebrembar qu’era rota vèrs Mart non ei dirècta e tanpòc pòt èster damb era madeisha velocitat tostemps. Non pòt èster atau. E tanben cau saber quan arrestar era velocitat se non volèm tustar damb era planeta vermelha. D’auti factors com era energia dera nau provòquen un viatge fòrça, fòrça complèx.
Damb era velocitat dera lutz aguest viatge sonque demorarie 3 minutes. Mès açò non ei possible. Era responsa definitua serie apuprètz 260 dies se era nau ei enviada en moment exacte. Damb ua tecnologia milhora eth viatge poirie demorar sonque 100 dies. E poirie èster que, lèu, e damb era propulsion fotonica, aguest viatge demorèsse sonque bèri uns dies e pro.
228 dies ei eth temps que demorèc en arribar a Mart era sonda americana Mariner. Es sondes Viking 1 e Viking 2 demorèren 304 e 333 dies. Era Curiosity, totun, demorèc sonque 254 dies. Quan demorarà ua nau d’SpaceX ? Apuprètz 260 mesi o mens de 9 mesi, damb era tecnologia actuau.
Era Redaccion
