Es ancians egipcians començauen a momificar hè 6.000 ans segontes ues analises naues hètes per scientifics des universitats de York, Macquarie (de Sydney) e Oxford. Açò que hè retrocedir es prumères momificacions en quasi 1.500 ans, e mòstren qu’es textils dab basa arrosiosa son es veritables ancessors dera momificacion egipciana.
Ath delà, es scientifics an confirmat que ath long des 5au e 4au milennis abans dera nòsta èra era momificacion se hège per un procès naturau. Es còssi se des·heiguien pera accion dera calor en caud e sec desèrt egipcian.
Momificacion damb diuèrses matèries
Er inici dera momificacion egipciana qu’ei, oficiauments, der an -2.500 a. C., quan comença er Empèri Ancian. Totun, era utilizacion de matèries arrosioses non siguec pas estenuda enquiar Empèri Miei (-2.000 enquia -1.600 aC).
Ei adara qu’es scientifics an descorbit qu’es egipcians ancians ja momificauen damb tela de lin e matèries arrosioses. “Ath long der an 2002 jo madeisha auia estudiat exemples de textils funeraris de diuèrsi lòcs qu’auien estat manadi a bèri musèus deth Reiaume Unit enes annades trenta deth sègle XX des d’Egipte” confirmèc Jana Jones, dera Universitat de Macquarie.
Es analisis revelèren que diuèrses arrosies èren utilizades. Fin finau, Stephen Buckley, dera Universitat anglesa de York, poguec estudiar 23 exemples e era pròva deth carbòni 14 demostrèc qu’es mès ancians èren der an -4.316 a. C.
Buckeley identifiquèc arrosia de pin, ua planta aromatica, sucre, petròli e òli de planta o animau enes embalatges qu’auien es defunts.”Bèri uns d’aguesti ingredients qu’èren amiats des de diuèrsi lòcs dera Mediterranèa – diguec Buckley -. Era arrosia de pin venguie deth sud-èst dera Turquia”.
Segontes Buckley, aguesti embalatges auien propietats antibacterianes e quan aquerò siguec descorbit pes egipcians ancians se pòt parlar vertadièraments der inici dera momificacion.
Christian Andreu
