ES DESCOBÈRT LO PRIMIÈR DINOSAURE AQÜATIC
Ja se sabiá qu’Spinosaurus aegyptiacus, lo celèbre dinosaure carnivòr, fasiá servir sas pautas per se mòure dins l’aiga e poder aital pescar. Çò que se coneissiá pas èra cossí o fasiá. E ara una analisi mai prigonda de l’unica esqueleta al Mond d’aqueste predator, trobada al Sahara marroquin, confirmèt qu’Spinosaurus foguèt un dinosaure aqüatic.
Segon l’estudi, Spinosaurus aegyptiacus foguèt un terapòde gigant que demorèt en çò qu’uèi lo jorn es l’Africa del Nòrd fa mai de 95 milions d’annadas (e doncas visquèt pas a l’epòca de Tirannosaurus). Fins ara se sabiá que manjava de peisses pr’amor del tipe de dents qu’aviá e per aquela rason foguèt classat coma un dinosaure anfibian, çò es que demorava una bona part del temps dins l’aiga, mas pas totjorn.
Lo primièr animal conegut de son genre
Totun, los cercaires cresián pas que demorèsse totjorn dins l’aiga pr’amor del tipe d’esqueleta qu’aviá: i aviá pas cap d’evidéncia d’una estructura propulsiva necessària per que un dinosaure gigant coma aquel poguèsse viure tostemps dins l’aiga. Mas las rasons donadas pels cercaires fins ara èran marridas, segon las donadas del nòu estudi.
L’estudi foguèt fach per una còla del National Geographic Explorer amb lo paleontològ de l’Universitat Mercy de Detroit, Nizar Ibrahim. Los paleontològs se n’anèron en Marròc tornarmai e poguèron descobrir de nòus tròces de l’esqueleta d’Spinosaurus desconeguts fins ara: foguèt alara que foguèt descobèrta una longa coa capabla de permetre lo movement lateral a aquel terapòde pr’amor de longs òsses.
En tot restacar la coa trapada amb la coa de divèrsas espècias de crocodil, e mai d’autres dinosaures, los scientifics poguèron confirmar qu’Spinosaurus foguèt un dinosaure carnivòr que demorava totjorn dins de flumes (o gaireben) d’aiga doça d’aquela region.
“Es un tipe de dinosaure que perseguissiá las predas dins l’aiga, çò diguèt lo paleontològ Ibrahim. Demorava pas sonque prèp del flume lo temps d’assajar de pescar de peisses. E çò de mai segur es que demorava la màger part de sa vida dins l’aiga e pas en defòra”.
Segon los cercaires qu’an fach aquela tròba, doncas, la compreneson suls dinosaures poiriá cambiar totalament car fins ara se coneissiá pas que tanben i aviá de dinosaures aqüatics. E segon aquel estudi, Spinosaurus foguèt lo primièr dinosaure aqüatic jamai trapat sus la Tèrra. E aquò seriá un fach nòu dins la paleontologia mondiala. L’estudi aguèt totjorn lo supòrt de la National Geographic Society e foguèt publicat dins la revista numerica Nature.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
