THYLACOSMILUS NON SIGUEC NAT PREDATOR
Thylacosmilus atrox, un marsupial extint que visquec en America deth Sud entre ara hè 9 e 3 milions d’annades (un periòde coneishut com Neogèn) non siguec cap tigre de dents de sable com se pensaue enquiara. Es sòns susprenents canins non èren entà gahar prèdes, segontes un nau estudi dera Universitat de Bristol.
Thylacosmilus tanben ei coneishut com eth marsupial damb dents de sable e enquiara siguec classat com un exemple classic d’evolucion convergenta pr’amor qu’auie tanben es dents qu’auie Smilodon fatalis , un tigre de dents de sable. E enquiara se pensaue que caçaue eth madeish tipe de prèdes. Mès eth dusau demorèc en America deth Nòrd e eth prumèr en America meridionau; açò que serie era mès grana diferéncia coma predators.
De hèt, Thylacosmilus pesaue d’aperaquí 115 Kg e Smilodon mès de 250 Kg. Totun, qu’ua còla de cercaires se demanèc se Thylacosmylus siguec vertadèraments un predator com Smilodon o un aute tipe de marsupial maugrat es sues dents. E pr’açò comencèc un nau estudi sus Thylacosmilus.
Ues dents diferentes
“Thylacosmilus atrox a ues dents susprenentes, mès era sua anatomia ère diferenta, çò diguec Christian Janis, d’aquera universitat anglesa. Non auie incisius utilizadi aué pes gats entà trèir era carn des uassi. A mès d’açò, es sues maishères non se podien barrar. Açò vò díder qu’es canins de Thylacosmilus sigueren fòrça diferenti des d’Smilodon fatalis”.
“Eth cran semblaue èster com eth d’un predator mamifèr mès un estudi prigond ajudèc a veir qu’eth cran de Thylacosmilus siguec tanben diferent, çò apondèc Borja Figueirido, dera Universitat de Malaga e que tanben participèc en estudi.
“Enquiara i auie diuèrsi estudis que comparauen era mossegada mès hloisha qu’era d’Smilodon, çò afirmèc Stephan Lautenschlager, dera Universitat de Birmingham. Mès i auec ua diferéncia essenciala entre es dues espècies, ua diferéncia de comportament. Thylacosmilus auie un cran e canins mès hloishi qu’es d’Smilodon. Mès auie mès fòrça quan eth movement ère entà darrèr e açò vò díder que Thylacosmilus non utilizaue es canins entà aucir mès dilhèu solament entà daurir casquelhs”.
Segontes açò aguesta naua visions sus Thylacosmilus non serie cap predator mès un carronhaire. Un examen detalhat des sòns molars confirmèc que minjaue carn hloisha. Son canins que semblen mès es d’un guepard qu’es d’un leon, çò confirmèc Larisa DeSantis, cercaira dera Universitat de Vanderbilt.E tot açò harie pensar que non siguec, com se pensaue enquiara, cap predator.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
