Calcular tostemps era edat d’un gosset non a estat jamès aisit. Totun, ara diuèrsi scientifics creèren ua naua manèra d’hè’c. E qu’ei fòrça diferenta d’aquera qu’auem totes en cap. Atau, quan totes normauments pensam qu’un an dera edat d’un gosset son sèt annades d’uman, ara semblarie que i cau somar encara mès annades: e un gosset labrador de quate annades non aurie 28 annades d’un uman mès 53.
Enquiara totes aqueres qu’auem un gosset auem pensat tostemps qu’un an deth gosset son 7 annades nòstes. Donques segontes un nau estudi hèt per scientifics èm confonudi, pr’amor que i cau somar encara mès annades. Era naua formula entà calcular era edat d’un gosset non ei aisida e siguec publicada ena revista online Cell Systems eth passat 2 de junhsèga. Segontes era naua formula çò que cau hèr qu’ei multiplicar eth logaritme naturau dera vida deth can per 16 e dempús encara i cau somar 31 annades mès.
Diuèrsi cambiaments genetics
Segontes semblarie es gossets patissen diuèrsi cambiaments genetics pendent era sua vida e, atau, quan mès vièlh ei un gosset mens grops de metil a en sòn ADN. Aguesti cambiaments son diferenti segontes era edat deth can e poden èster utilizadi pes scientifics entà descorbir exactaments era edat deth gosset. Totun, era resulta ei ua formula un shinhau mès dificila qu’era qu’auem es amants des gossets en nòste cap. E açò se debanarie tanben en d’autes espècies e non solament en es cans.
Entà hèr aguest estudi es cercaires analizèren eth nivèu de metil en 320 umans damb edats situades entre 1 e 103 annades e 104 gossets labrador damb ua edat que se situaue entre es 5 setmanes e es 16 annades. Es scientifics tanben trapèren qu’era relacion entre es gossets e es sòns propietàris tanben cambièc pendent eth temps.
Atau, es gossets qu’an solament setmanes d’edat se desvolòpen fòrça rapid, encara mès qu’es umans. Un gosset damb solament 8 setmanes de vida poirie èster comparat damb un uman de 9 annades. Un gosset de solament ua annada serie com un uman damb 31 annades e un gosset damb quate annades aurie ua edat d’uman pròplèu as 53 annades.
Era naua formula donques situarie era edat d’un gosset labrador qu’abans totes pensàuem qu’auie 12 annades en 70 annades dera vida d’un uman. Totun, ara es madeishi cercaires demanen hèr un estudi mès prigond sus autes races pr’amor qu’era formula poirie cambiar. Çò qu’ei clar ei qu’un gosset damb 15 o 16 annades ei fòrça fòrça vielh pr’amor qu’aurie aperaquí 130 annades d’uman. Arren a veir damb çò qu’auíem pensat enquiara, vertat ?
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
