Un nòu estudi fach per de cercaires grecs arriba ara al congrés annadièr de cardiologia estatsunitenca. Amb mai de la populacion d’aquel país que patís nauta pression sanguina, los cercaires grecs vòlon aconselha de dormir un pauc – de mejana 50 minutas – pendent lo miègjorn pr’amor qu’a desparièrs efèctes positius sus la santat. Un d’aqueles seriá una melhor pression sanguina.
A mai, los mètges e cercaires grècs qu’an fach aquel estudi atanben an volgut confirmar que far una dormida pendent lo miègjorn ajuda melhorar lo nivèl d’energia e aver d’una manièra generala una melhor santat corporala: segon aqueste nòu estudi dormir la sièsta redusís lo nivèl de pression que i a dins la sang per rapòrt ad aquelas personas que o fan pas.
“Dormir un pauc pendent lo miègjorn redusís plan lo nivèl naut de pression sanguina. Tanben ajuda e plan lo nivèl de sal, e d’alcoòl, mas far una dormida pòt arribar redusir de 3 a 5 mm/Hg la pression sanguina, çò diguèt Manolis Lallistratos, cardiològ de l’Espital General de Voula, en Grècia. A mai, la majoritat de medecinas donadas uèi lo jorn solament redusisson de 5 a 7 mm/Hg e pro”.
La mejana de temps de besonh per ajudar la santat quora dormissèm un pauc pendent lo miègjorn segon aquel estudi seriá un pauc mens d’una ora al jorn e aquò seriá coma redusir fins a 5 mm/Hg dins la pression sanguina. E encara mai, per cada ora de mai la pression sanguina se redusiriá encara fins a 3 mm/Hg mai.
Una tròba certa
La descobèrta es estada classada coma plan importanta dins lo mond de la cardiologia pr’amor qu’es un biais natural e economic de melhorar la santat sustot en de personas que patisson nauta pression sanguina. E mai encara quora los mètges considèran que poder redusir la pression sanguina fins a 3 mm/Hg pòt demenir al còp lo risc de patir una ataca cardiaca en fins 10%, çò qu’es plan.
Los cercaires qu’an realizat aquel estudi afirman ara que far una dormida (pas gaire longa) pendent lo miègjorn es una manièra de melhorar la santat sens cap problematica posteriora causada per de medecinas. En mai d’aquò, los mètges atanben trobèron que dormir la sièsta pòt èsser restacat a mens d’ipertension arteriala. L’experimentacion facha amb mai de 200 volontaris aital o mostrèt. La majoritat d’aqueles avián una edat pròcha als 62 ans e gaireben la mitat èran de femnas. Un 25% fumavan o avián diabèta. Los factors de risc èran parièrs en totes los grops (franc dels fumaires). Totun, los scientifics confirmèron que, a mai de l’estil de vida vidanta ( alcoòl, cafè, sal e activitat fisica) la pression sanguina èra desparièra dins aquel grop de personas que dormissián pendent lo miègjorn ( 128/76 v134/79 mm/Hg).
“Amb aquel estudi volèm pas ara demandar la gent de dormir pendent d’oras e oras pendent la fin del jorn, çò diguèt Kallistratos. Totun, que las personas que fan aquò aurián de saber qu’o far compòrta pas se sentir colpable: amb aquò la melhora de la santat es granda”.
Ara la comunautat medicala vòl far mai recèrca sus tot aquò. Qualqu’unes mètges dison que la dièta mediterranèa e la cultura del luòc aurián tanben jogat un ròtle dins l’estudi. Cal veire doncas qualas ne serián de resultas mai prigondas.
La redaccion
