Los lops mutants de Chernobil qu’aurén desvolopat gèns resistents au càncer segon un navèth estudi. E los cercaires qu’espèran poder trobar adara com lutar contra lo càncer en umans. Tot qu’auré començat l’an 1986, aprés l’accident nuclear de Chornobil, en Ucraïna, quan mei de 100.000 abitants locaus qu’estón evacuats deu territòri. La fauna deu lòc, totun, que pateish mutacions de tota sòrta dens de çò que los cercaires coneishen dab lo nom d’airau proïbit. La fauna, que pateish aqueras mutacions pr’amor de la radioactivitat.
Dab los ans e divèrsas generacions aprés, qualcunas espècias que comencèn de s’adaptar ad aquera radioactivitat. Los lops n’estón pas nat excepcion. Adara, un estudi deu laboratòri de Shane Campbell-Staton de l’Universitat de Princeton, que confirmè que los lops que son dens l’airau proïbit que patín ua mutacion entà poder resistir lo càncer, derivat dirèctament d’aquera radioactivitat.
E òc, los lops de Chornobil aurén desvolopat deus gèns navèths que pòden resistir de malaudias com lo càncer. Que’us desvolopèn au long deus darrèrs 40 ans. Entà Cara Love, biologista d’aquera universitat, los sistèmas immunitàris deus lops que cambièn e adara que son plan parièrs aus deus malauts de càncer que son garits dab radiacion.
De gèns cambiats per la radiacion
L’equipa de cercaires, dirigits per Love qu’examinèn que los lops de Chornobil pateishen mei d’11,28 millirèms de radiacion cada dia au long de tota la soa vita e qu’açò qu’ei dinc a sheis còps mei lo limit de securitat entà un èste uman. Atau, los lops qu’aurén cambiat lors sistèmas immunitàris. Los cercaires, que tanben estudièn los gèns d’aquera espècia e poguèron confirmar que semblavan este resistents a ua possibla creishença de càncer pr’amor de la radioactivitat.
La notícia, a mei d’estonanta, qu’ei plan importanta entaus cercaires, pr’amor qu’adara creden qu’aquera coneishença – com cambiar los gèns entà lutar contra lo càncer – tanben que’s poiré estudiar dab umans. E que poiré estar un camin entà trobar ua fin ad aquera òrra malaudia. Los scientifics confimèron que hèra umans qu’avèvan patit tanben mutacions geneticas que podèvan entrainar la neishença de càncer, sustot pr’amor de la preséncia d’ua varianta deu gèn BRCA. E çò que vòu har adara aquera equipa de cercaires qu’ei identificar possiblas mutacions geneticas qu’ajudèssen a lutar contra lo càncer.
L’estudi comencè adara dètz annadas a, en 2014, maugrat qu’aprés la pandemia los cercaires poguèron pas entrar en l’airau proïbit. Purmèr pr’amor de la medisha pandemia, e aprés pr’amor de la guèrra contra Russia. Totun, los cercaires tanben soslinhèn que la securitat de las personas qu’ei mei importanta.
Cronica de Ràdio País: https://soundcloud.com/radio-pais/natura-deus-lops-resistents-au-cancer?in=radio-pais/sets/natura
