Venon de descobrir doas nòvas espècias d’aucèl del solelh, tanben coneguts coma saimangas. Los cercaires, del Trinity College de Dublin, an confirmat qu’èran de nòvas espècias e an identificat los aucèls dins los genres de Cinnyris e Leptocoma. De soslinhar que los aucèls del solelh son una familha de pichons aucèls espandits entre Africa e Austràlia e semblables als bècaflors (o colibrís) pr’amor de lor plumatge amb de plumas que lusison fòrça jos la lutz solara.
Los aucèls del solelh, qu’es lor nom popular, son estats plan presats pels aimadors dels aucèls de tota la planeta pr’amor de lors colors totjorn estonantas. Totun, son un tipe d’aucèls plan desconeguts fins a nòstra epòca, e aital Fionn Ó Marcaigh e d’autres cercaires an confirmat ara que son estadas trobadas doas nòvas espècias del genre Cinnyris.
Una espècia classificada uèi per uèi seriá la de Cinnyris jugularis, espandida entre China e Austràlia. De remembrar qu’aquela seriá una espècia d’aucèl tanben fòrça rara pr’amor qu’auriá trencat la celèbra barrièra de la Linha de Wallace –una barrièra biologica qu’empediguèt pendent de milions d’annadas l’espandiment d’espècias asiaticas mai enlà e qu’en causa de la quala aquestas jamai non serián arribadas al continent australian–. En mai de Cinnyris jugularis, los cercaires an tanben classificat Leptocoma aspasia coma una autra nòva espècia d’aucèl del solelh.
La Linha de Wallace
“Totun, las populacions d’Asia e d’Austràlia son desparièras, çò dison los cercaires. E Wallace auriá encara rason. L’espècia que demòra en Celèbes es diferenta de la de Nòva Guinèa. Malgrat aquò, es una nòva espècia espandida per un territòri fòrça long mentre qu’es un aucèl plan pichon !”
“Es estonant de poder dire que i a una infinitat de nòvas espècias per descobrir encara en aquela region, çò ditz Ó Marcaigh. La descobèrta de nòvas espècias d’aucèl es una remembrança que la biodiversitat pòt èsser trobada pertot. E una d’aquelas doas nòvas espècias d’aucèl del solelh es estada trapada près dels umans, près de vilas e vilatges, e non pas dins los bòsques mai prigonds”. L’estudi foguèt publicat dins lo numeric Zoological Journal of the Linnean Society.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
