DESCOBÈRTA UNA NÒVA ESPÈCIA DE TIGRE DENTS DE SABLE
Una còla de paleontològs identifiquèt una nòva espècia de tigre de dents de sable. Lo sieu nòm es Amphimachairodus hezhengensis e sembla que visquèt de biais social amb la sieuna comunautat dins un environament dubèrt fa entre 9 e 10 milions d’ans en çò qu’uèi es China.
Segon los cercaires “Amphimachairodus foguèt l’espècia pus espandida pendent lo Miocèn de totas las espècias de tigre de dents de sable, çò diguèt Qigao Jiangzuo, scientific de l’Institut de Paleontologia dels Vertebrats de l’Acadèmia de Sciéncias chinesa, a Pequin. Ne podèm trapar membres del sieu genre per tota la planeta, dempuèi Euròpa e America fins a Asia ».
Una espècia plan espandida
Lo fossil del predator preïstoric foguèt encontrat als depaus de Linxia e Baode, en China, mas tanben a las formacions de Quirubis e Coffee Ranch, a America. Foguèron de predators plan semblants a Homotherium, çò que fa pensar que benlèu aguèron d’adaptacions environamentalas semblantas. Totun, es pas coneguda encara l’origina de l’espècia e perqué aguèt aquelas caracteristicas.
”La tròba d’un cran entièr a Linxia, en China, demostrèt que visquèt al nòrd-èst del replanat tibetan. Es un cran que confirma que foguèt un dels primièrs especimèns de l’espècia, çò confirmèron los cercaires. Faguèt fins a 2 mètres de longada e aguèt una facia longa e dents pichonas. Aguèt una granda abilitat a l’ora d’espepissar l’environament que i aviá al sieu torn e pr’amor d’aquò cal pensar que viure dins un environament dubèrt benlèu entraïnèt tanben de caracteristicas socialas ».
Pasmens, las caracteristicas biologicas de Amphimachairodus tanben demòstran que foguèt un grand predator qu’evolucionèt vèrs la caça en grop. Segon los paleontològs foguèt un felid que representa l’evolucion dels coneguts coma macairontides en tot demostrar cossí s’adaptèron plan als espacis dubèrts abans de s’espandir per la planeta tota. Pels scientifics aqueles cambiaments morfologics e de conducha arribèron lèu pr’amor d’una màger sequera al replanat de Tibet e una màger concurréncia entre predators carnivòrs de l’airal. L’estudi es estat publicat al numeric Proceedings of the Royal Society B.
La Redaccion
