Damb era ajuda informatica e er escanerizat de neutrons, ua equipa de fisics deth Labotaròri Nacionau d’Oak Ridge, Carolina deth Nòrd, a descobèrt un nau estat dera molecula dera aigua. Era trobalha remet en question totauments es models fisics basadi enes energies des sòns tipes de vibracion.
Er estudi a estat publicat ena revista scientifica Physical Rewiew Letters e confirme un nau estat quantic des molecules dera aigua que i a laguens es canaus exagonaus ultrapetiti deth mineral de berili, que normauments patís ua delocalizacion de protons e electrons.
Atau, e en baishes temperatures, aquestes molecules aquatiques pateissen un movement quantic que las hè a separar-se des parets deth tunèl on son, un hèt totauments enebit en eth mon classic. Aquerò a estat confirmat per Alexander Kolesnikov, cap der estudi qu’a hèt era descobèrta.
Delocalizacion der oxigèn e hidrogèn
Açò vò díder qu’es atòms d’idrogèn e oxigèn que i a laguens era molecula dera aigua se delocalizen e desseparen en sièis posicions desparières ath còp. Aguest tipe de fenomens solament passe ena mecanica quantica e non i a nat experiéncia parallela ena vida vidanta.
Era descobèrta poirie ajudar era fisica a descríuer melhor es caracteristiques termodinamiques dera aigua en environaments fòrça barrats e tanben era difusion e transpòrt en es canaus des membranes dera cellula en diuèrsi mineraus.
“Damb aquerò descobèrt – çò diguec Lawrence Anovitz, tanben cap der estudi – se pòt discutir sus diuèrsi materiaus biologics e geologics en tot sajar d’explicar aguest fenomèn. Ei ua naua manèra de compréner eth comportament der aigua e coma aguesta utilize era energia”.
Pr’aquò es scientifics an confirmat qu’açò tanben passe enes molecules d’aigua que i a en es anèths d’esmeralda o aguamarina que fòrça persones an. Sustot, enes sues varietats blu e verda, hètes de berili. Aguestes se delocalizen e era mollecula der aigua pren un aute aspecte, tot diferent”.
“Era energia cinetica dera aigua obtenguda en aguest experiment de neutrons en temperatura zèro ei 30% menor qu’era que i a en aigua solida o aigua liquida -çò diguec Kolesnikov”.
Christian Andreu
