Ongan, la Corèa del Nòrd a fach espetar la sieuna quatrena bomba nucleara e après, lo sieu president , a menaçat lo mond amb d’atacs preventius se son shordats. Mas aquesta es la quatrena bomba nucleara qu’aqueste país fa espetar. La primièra bomba nucleara que foguèt espetada per aqueste país o foguèt l’an 2006.
E aqueste país asiatic es solament un mai del club nuclear que i a en la nòstra planeta. Lo jornal anglés The independent a publicat fa pauc una mapa nucleara ont se pòdon veire las mai de 2.624 explosions nuclearas qu’a patit la Tèrra, la planeta nucleara.
Mai de 70 ans de bombas nuclearas
La primièra detonacion nucleara que patiguèt la planeta se debanèt en julhet 1945. Foguèt la pròva nomenada Trinity. Aquesta aviá 20 megatonas de poténcia e lo scientific nuclear Robert Oppenheimer diguèt : “ Sabiam que’l mond non seriá pas pus lo meteis. Qualqu’uns riguèron, d’autres plorèron, mas la granda majoritat demorèt en silenci”.
Après, en agost d’aquele an, arribèron las bombas atomicas d’Hiroshima e Nagasaki, lo solet cas d’utilizacion d’armas nuclearas que i a agut jamai en guèrra. 250.000 mòrts e d’aquestes solament 20.000 èran civils.
En 1949 la Union Sovietica faguèt espetar la primièra bomba nucleara comunista e en 1952 lo Reiaume Unit faguèt espetar una autra bomba nucleara en aigas oceanicas australianas. L’Estat francés, totun, o faguèt en lo desèrt algerian en 1960.
Après aquò, las bombas e pròvas nuclearas an agut mai poténcia. En 1961 la Union sovietica faguèt espetar una bomba nucleara de 50 megatonas. Lo misharnon nuclear se levèt fins a 67 quilomètres, set còps mai que l’auçada de l’Everest. Aquesta bomba, nomenada Tsar, èra ja 1.500 còps mai poderosa que las d’Hiroshima e Nagasaki. De mai, China, Índia e Paquistan tanben o faguèron e se cre qu’Israel e l’Africa del Sud tanben an uèi lo jorn l’arma nucleara.
Lo Tractat d’Enebicion Total de Pròvas Nuclearas foguèt signat en 1996 e dempuèi aquela non s’an fach mai de pròvas – mens Corèa del Nòrd – pr’amor que lèu la planeta poiriá èsser nomenada la Planeta Nucleara e pas mai la Planeta Blava.
Christian Andreu
