DE NOMADAS ESPACIALS
Una còla de cercaires de l’Universitat d’Harvard assegurèt que la vida a l’espaci es plan mai complèxa de çò que poiriam pensar e que la sieuna origina, malgrat que totes podèm pensar que seriá una planeta coma la nòstra, poiriá aparéisser en d’objèctes espacials nomadas que viatjan a travèrs de l’Univèrs.
Aquò es aital après cambiar la pensada general scientifica sus l’origina de la vida a l’espaci, car fins ara òm pensava que sonque se podiá debanar en de planetas semblables al nòstre, la Tèrra. Una planeta qu’auriá de besonh poder recebre de calor d’una estela pròcha, coma lo Solei. E, aquela planeta tanben auriá d’aver una gravitat e superfícia atanben semblables als de la planeta blava.
Mas, la pensada general de la comunautat scientifica comença de cambiar pr’amor que pas totes los cercaires pensan aital. E lo nòu estudi n’es la consequéncia : Los scientifics qu’i participèron creson que la vida extraterrèstra tanplan poiriá nàisser en l’espaci e luènh d’una planeta e que sonque necessitariá de condicions drechas.
Objèctes espacials coma meteòrs
Uèi i a fòrça cercaires que creson que qualcunes dels objèctes que i a en l’espaci, coma los meteòrs, podòn aver sus la sieuna superfícia de microorganismes vius. E tanben sospechan que la preséncia de vida complèxa a l’espaci sonque a de besonh d’aiga liquida, de temperaturas suaus e de gravitat e pro.
Benlèu pr’açò los cerciares causiguèron de cercar la vida en de planetas semblables al nòstre e calguèt l’aparicion d’un estudi coma aqueste per suggerir a d’autres cercaires e la comunautat scientifica internacionala que benlèu òm aviá cercat al luòc marrit. Pr’amor que tanben i poiriá aver de vida en d’objèctes espacials pus pichons o encara en de naus espacialas.
L’estudi es estat publicat al numeric Astrobiology : ” La definicion estandard internacional sus la preséncia de vida confirma que sonque pòt aparéisser se i a la gravitat drecha e la temperatura de la superfícia de la planeta es pro suau, çò diguèron los cercaires. Pasmens, l’evolucion poiriá èsser desparièra en d’autres luòcs e l’abitat ideial per la vida tanben poiriá se debanar en de luòcs sens d’estelas pròchas ».
Per ansin, l’estudi, signat per Robin Wordsworth, de l’Universitat d’Harvard e Charles S. Cockell, de l’Universitat d’Edimborg, sosten que l’espaci es pas contràri a la vida per se. Segon la majoritat de cercaires de temperaturas extrèmas, cap pression atmosferica e cap de gas, de radiacion cosmica e pas de noiridura provòcan una fauta de vida totala a l’espaci. Mas tot aquò poiriá èsser superat en d’abitats vius : al torn d’estelas nanas rojas los organismes poirián aver creat de murs per se protegir de l’espaci extèrn.
Segons los cercaires, aquelas extructuras poirián aver de murs bastits amb de material biologic que poiriá reduïre la fugida de compausats de besonh per la vida. Mas aqueles murs poirián tanben daissar dintra la lutz e arrestar de rais ultraviolèta marrits al còp que daissan dintrar de gases coma lo vapor d’aiga.
Son d’abitats vius que formarián un ecosistèma plan drech per la fotosintèsi entre 1 e 5 còps la distància de la Tèrra al Solei. Car un mur d’un centimètre de grossor de material biogenic poiriá capturar de gases essencials pendent milièrs d’annadas en tot permetre, en mai, l’evolucion de l’ecosistèma.
Aquel abitat poiriá tanben contunhar malgrat l’arribada de pichons meteòrs, de radiacion o lo pròpri temps. L’estudi suggerís, a mai, qu’aquela estructura poiriá s’adobar a se meteissa amb de comunautats de micròbis utils per reciclar lo materials dels murs o bastir de nòvas cambras.
Pels cercaires aqueles uòus biologics espacials poirián èsser semblables a d’abotats biogenics amb una temperatura establa e tanben un pression desparièra del zero epacial. La temperatura poiriá demorar plan al torn dels 50ºC e aital aver l’aiga totjorn liquida quora en defòra seriá glaçada. Lo material poirián èsser aerogèls de silici o encara de diatomèas, d’algas que produïson de biais natural de silici.
La Redaccion
Fotografia principala: Soomness/CC.
