Una nòva descobèrta arqueologica al desèrt del Neguev (Israel) poiriá far canviar la coneissença qu’avèm de la preïstòria. La primièra revolucion tecnologica foguèt pas lo Neolitic mas plan mai endarrièr, car se debanèt fa mai de 50.000 ans.
Aquesta seriá doncas una descobèrta mai del grand tresaur qu’es aquel desèrt. En 2019 una còla de cercaires descobriguèt que la bièrra ja èra coneguda almens fa mai de 3.000 ans. Puèi, en 2020 foguèt descobèrt l’usatge de cannabis. Ara, la nòva descobèrta foguèt publicada al numeric Proceedings of the National Academy of Sciences (PNAS).
La descobèrta es plan importanta pr’amor que confirma que nòstra espècia e los neandertalians vivián amassa fa mai de 50.000 ans e la resulta ne foguèt canviar totalament la tecnica de talhat de silex, almens en aquesta region.
L’article publicat e signat per un desenat de scientifics israelians mas tanben de franceses (dont Elisabetta Boaretto, Marion Hernandez, Mae Goder-Goldberger, Vera Aldeias, Lior Regev, Valentina Caracuta, Shannon P. McPherron, Jean-Jacques Hublin, Steve Weiner e Omry Barzilai), afirma qu’aquel tipe de canviament tecnologic se debanèt plan lèu e auriá ajudat a caçar melhor car permetèt usar de nòvas armas, ara amb de pèiras; de javelinas a mai de flèchas.
Lo centre del desèrt
Lo siti descobèrt es a Boker Tachtit, pas luenh de Sde Boker, al centre del Neguev. Ja èra estat descobèrt pendent la decada de 1980. Mas una campanha d’excavaments en 2013 permetèt descobrir fòrça pèiras talhadas e troçes de carbon; La data dels espleches es de 50.000 ans.
Segon aquò, los neandertalians aurián arribat a la region fa mai de 70.000 ans. Lor origina èra septentrionala. Nòstra espècia auriá sortir d’Africa fa aperaquí 200.000 ans. E ambedoas espècias comencèron a interagir. Totun, foguèt pas fins a l’arribada d’una nòva ondada de populacion amb una origina arabica (o benlèu del Nil) que comencèt lo mestisatge genetic. E nasquèt una nòva cultura. La cultura d’armas de fusta amb de pèiras per caçar melhor. Un fach que canvièt al 100% lo biais d’interagir de nòstra espècia amb la natura. E foguèt per totjorn.
La Redaccion
Fotografia principala: Jean et Nathalie/CC.
