DE LUM LED PER VÉNCER LO CÀNCER
Una còla de scientifics a creat de lum LED per tuar de cellulas cancerosas sens damatjar las sanas. La terapia es nòva, e serà importanta per luchar contra lo càncer pr’amor qu’es una tecnologia basada sus de lum LED e de nanoflòcs d’estanh, que tuan las tumors d’un biais segur. La tecnologia foguèt desvolopada per de cercaires de Tèxas e Portugal, e capita plan dins fins al 92% dels cases de càncer de la pèl.
Los scientifics an desvolopada una terapia del càncer qu’utiliza de lum LED e de flòcs ultraprims d’estanh per eliminar las cellulas cancerosas en tot protegir los teissuts en bona santat. La diferéncia amb la quimioterapia tradicionala es qu’evita los efièches segondaris doloroses patits sovent pels pacients.
Aquela tecnologia es la resulta d’un acòrdi entre l’Universitat de Tèxas e l’Universitat de Porto, en Portugal, a travèrs del programa UT Austin e Portugal. L’acòrdi a per tòca de far venir de terapias coma la de la lutz LED mai accessiblas a totes los pacients que patisson lo càncer. Car los tractaments actuals se basan sus de materials fòrça cars e sus de lasèrs poderoses que pòdon tanben damatjar lo teissut encara san pròche de las cellulas cancerosas. La nòva tecnologia es mai economica e tanben mai segura.
Un tractament revolucionari
«La nòstra tòca èra de trobar un metòde eficaç, segur e accessible a totes, çò diguèt Jean Anne Incorvia, professora al departament d’engenhariá electrica e informatica e cap del projècte. Amb la combinason de lum LED e de nanoflòcs SnOx, avèm pogut desvolopar un metòde per tuar las cellulas cancerosas mas en tot salvar las cellulas sanas pròchas.»
Las primièras resultas son un tractament plan eficaç contra las cellulas de càncer colorectal e tanben de càncer de la pèl. Cal solament aplicar lo tractament pendent 30 minutas per poder destruir fins al 92% de las cellulas afectadas de càncer de la pèl o fins al 50% de las cellulas tocadas pel càncer colorectal. E las autras cellulas (sanas) demòran intactas.
Lo càncer es encara uèi la segonda causa de mòrt al Mond. E la majoritat dels tractaments actuals an d’efièches segondaris grèus. Ja fasiá de temps que se cercava de terapias alternativas. Una d’aquestas es la terapia fototermica pròcha a l’infraroge, qu’utiliza de lutz per escalfar e destruire de cellulas cancerosas sens cirurgia ni medicaments toxics. E aquesta es la basa de la recèrca dels cercaires del programa UT Austin e Portugal.
Ara, amb aquelas bonas resultas, los cercaires vòlon comprene cossí la lutz e la calor pòdon interagir sul procès de càncer e veire se tanben d’autres materials pòdon ajudar a n’acabar totalament amb aquel tipe de càncers o encara d’autres. E es previst que i aurà de medicaments que poiràn èsser administrats dirèctament als pacients.
«Cal poder balhar lo nòu tractament a totes los pacients, çò diguèt Artur Pinto, cercaire de l’Universitat de Porto. Pels càncers de la pèl en particular, un jorn, lo tractament poiriá passar de l’espital a l’ostal del pacient. Serà un dispositiu portatiu que se poirà plaçar sus la pèl e que destruirà totas las cellulas cancerosas e reduirà lo risc de recidiva del càncer.»
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
