Après la Primièra Guèrra Mondiala, los Estats Units èran venguts una granda poténcia mondiala, e la siuena societat gaudissiá d’una espandida e una economia màger. Las exportacions a Euròpa e a d’autres continents asseguravan una balança comerciala exteriora fòrça positiva.
Perqué la crisi de 1929, la Granda Depression? Podèm trobar fòrça motius, mas ne parlarai d’un d’eles. La societat dels Estats Units viviá un capitalisme que melhorava la qualitat de vida dels ciutadans, mas sustot amb la preséncia d’aparelhs electrodomestics, de veituras familialas e d’autres produchs que facilitavan la vida. La tecnica del pagament a tèrmes èra utilizada per las familhas amb mens intradas de sòus, que podián accedir a aqueles produchs.
Una demanda màger
E amb aquela enòrma demanda, las entrepresas dels Estats Units comencèron a produsir de grandas quantitats de produchs per satisfar los besonhs del mercat. Mas aquela granda produccion considerava pas una idèa basica. Se una familha de classa mejana commpava una maquina de netejar o una veitura ongan, tornariá pas ne comprar una autra l’an seguent. E las entrepresas fabricavan amb l’idèa de manténer lo meteis nombre de compradors cada an. E la possibilitat d’exportar a Euròpa aqueles produches possedissiá tanben una limitacion numerica amb la meteissa causa.
Simultanèament los estatsunitencs compravan d’accions de las entrepresas, quand vesián los grands beneficis obtenguts. E depausavan totes los estalvis familials en l’inversion en Borsa. Mas lo moment tragic arribèt. Quand totas las familhas dispausavan d’aparelhs electrodomestics, de veituras… e compravan pas d’autras unitats, las existéncias comencèron a emplir los magasèms de las entrepresas. Ara l’ofèrta èra fòrça superiora a la demanda.
Los beneficis començavan una drastica reduccion. E quand la notícia arribèt a Wall Street, la sedença de la Borsa de Nòva York, totes los investisseires volguèron vendre las accions que possedissián, en tement una davalada de la cotizacion. Èra lo panic. Mas aquela enòrma ofèrta de venta d’accions accentuèt tanben en una màger magnitud la davalada del prètz de las accions. Qualques uns investisseires perdèron totes los estalvis (e lo patrimòni familial) solament en paucas oras. Vertadièrament la tragedia se desvolopèt entre dos jorns, lo 24 d’octòbre (lo dijòus negre, “the Black Thursday”) e lo 29 d’octòbre (lo dimars negre, “the Black Tuesday) de 1929.
Las consequéncias posterioras èran previsiblas: lo barrament d’entrepresas, l’elevacion de la taxa de caumatge a limitas desconegudas, la roïna de familhas de classa nauta, mas tanben paubresa sustot en las classas bassas e en fòrça familhas de la classa mejana…
Començava la Granda Depression que s’estendèt tanben a Euròpa, pels ligams entre l’economia dels Estats Units e las economias dels païses europeus, pendent tot lo decènni dels ans 1930. E un conselh: invertir en Borsa es fòrça rendable, mas devètz analisar totes los detalhs de las possiblas inversions abans de començar. E sustot susvelhar en las epòcas d’inestabilitat politica e economica.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
