L’estudi de la girafa a menat fa gaire a de conclusions nòvas e estonantas: la girafa èra uèi per uèi un mamifèr fòrça pauc estudiat e se sabiá pas qu’es un dels erbivòrs pus complèxes d’Africa. D’efièch, de cercaires de l’Universitat de Bristol an descobèrt qu’es un mamifèr almens tan complèxe coma l’elefant.
Fins ara se pensava que la girafa èra un mamifèr sens estructura sociala e que frequentava rarament d’autres especimens de son espècia. L’estudi d’aquel ervibòr, aquestes darrièrs dètz ans, a pasmens ajudat a comprene melhor quina es sa vertadièra estructura sociala. E la conclusion del nòu estudi es segon plusors cercaires estonanta.
Un mamifèr amorós
L’estudi, publicat dins lo numeric Mammal Review, demòstra que la girafa passa mai del 30% de sa vida a sonhar sos pichons. Aquò es plan semblable al temps emplegat per d’autres mamifèrs gigants africans amb lor progenitura, coma los elefants o las òrcas. E aquò seriá un fach clau per ajudar las pichonèlas girafas a subreviure.
Aquel fach dependriá de la celèbra ipotèsi de la mameta, que se pòt trapar en las girafas a mai d’autres mamifèrs dont los umans. La mameta es un especimen que viu longtemps e assistís sa filha per sonhar la tresena generacion. E aquò tanben ajuda plan per far subreviure los gèns de la quita girafa mameta. Es per aquò que se pòt dire tanben que la familha de la girafa es matrilineara, coma la de l’elefant.
Zoe Muller, autor de l’estudi, confirma que “la girafa es un mamifèr tras que complèxe e se pòt comparar sa societat amb la dels elefants, dels cetacèus e mai dels chimpanzés. Es pas de creire de veire qu’es tanplan un dels mamifèrs mens estudiats de la planeta”.
Segon los cercaires d’aquel estudi, de reconèisser la girafa coma una animal plan intelligent que viu dins una de las societats pus complèxas d’Africa es de besonh, car sonque aquò a permés sa subrevivéncia dins un mond plen de predators coma la savana. Totun, tanben demandan d’estudiar d’un biais mai prigond lo ròtle de las girafas pus vièlhas e dels autres adultes per comprene la complexitat d’aquela societat. E de reconéisser aquò tanben ajudarà a las protegir melhor.
La Redaccion
